Inthiarna mumal nei lo awm lohnaah Champhai district puan a ni dawn

Champhai District Swachh Bharat Mission (Gramin) chu Nilaini khan DC conference hall-ah ṭhu a; inthiarna mumal nei lo awm lohna district, Open Defecation Free (ODF)-ah Champhai district chu October 2016-a puang turin ruahmanna an siam.

Meeting-a tarlan danin, Champhai district-ah hian khua/veng 108-ah chhungkua 16,174 vel an awm. Village council-te'n zun leh êk thlahdah kawngah an fihlim thu an puan hnuah, Champhai district chhunga Rural Development block palite'n an huam chhunga chhungkaw awm zawng zawng zinga 10% an enfiah hnua Open Defecation Free an ni ngei tih an nemnghet leh a ni.

District Level Swachh Bharat Mission Committee pawhin Champhai district chhunga chhungkaw awm zawng zawng zinga 5% a enfiah hnuah, zun leh êk thlahdah kawngah Champhai district chu a fihlim ngei a ni tih a finhfiah leh bawk.

Meeting chuan, kawng hrang hranga endik a nih hnua an district Open Defecation Free-a puan theih tih finfiah a nih tak avangin, October 2016 chhungin Open Defecation Free a nihna chu puan a, lawm nghal an rel a ni.