Sangau-ah Rev. C Chanchinmawia lehkhabu hâl

Sangau khawtlang chuan Rev. C Chanchinmawia ziah, 'Thuthlung-thar Hrilhfiahna' tih leh-khabu chu Sangau khua mawi lo taka tarlanna nia an ngaih avangin nimin khan an hâl.

Sangau Joint V/C leh YLA telna Joint NGO-te tarlan danin, Rev. C Chanchinmawia ziah 'Thuthlungthar Hrilhfiahna' tihah hian Sangau khua chu tun hmaa Korinth khua misual leh awm ṭha duh lote nen tehkhin a ni. "Zoram khawvel hriata mawi lo leh dik lo taka Sangau khaw hming tarlan a nih duh loh entir nan Rev. C Chanchinmawia lehkhabu Sangau mipuite'n an hâl a ni," an ti.

Phek 460-na paragraph hnihna, tlar 12-naah, "Sualna lamah Korinth hi a hmingthan em avâng hian, 'I Korinth e,' tiin mi hur leh awm khawlote chu an lo inko
ṭhin a ni. 'I Korinth' an tih chuan an nun kha sualna lamah a pil thûk hle tawh tihna a ni. 'Korinth-ho ang maiin i nung a nih hi,' tiin an sawi bawk thin. 'I nun hi a rawva emaw, a tlaran zâwng hlirin i nung,' tih nân an hmang ṭhin a ni. Tunlai ṭawngin, "I Sangau
e," an tih ang hi a ni ang," tia ziah a ni.

Chhawkhlei Times editor FC Vanlalzawna hnen aṭanga tuh dawn danin, lehkhabu hâlnaah hian mi 1,000 chuang an pung khawm a, sikul leh office hrang hrangte khâr a ni.

Sangau Joint VC & NGO hruaitute chuan Rev. C Chanchinmawia chu show cause notice pein, ni 10 chhung ngeia insawifiah turin an phût. Resolution pass in, 'Thuthlungthar Hrilhfiahna' tih lehkhabu chu zuar chhuak tawh lo tur leh a softcopy pawh nuaibosak nghal turin thuneitute an ngen a ni.