Congress chêt dan zu haw chêt dan a ni lo - Zoramthanga

MNF president Zoramthanga chuan, Congress party chêt dan chu zu haw chêt dan a ni loa sawiin, "An zu zawrhah hian sorkar hotu liante an hlâwk em em a, a manah mipuite’n kan nunna kan pe mek a, a pawi tak zet a ni," a ti.

Nimina Mizo Hnam Runa inkhawmah thu sawiin, Zoram-thanga chuan, Serchhip District Jail hawnnaa Home minister R Lalzirliana'n, ‘Zu hi duh lo berte zinga mi ka ni a, tihbo ka duh,’ tia a sawi chungchangah, Congress chet dan chu zu zawrh duh lo leh zu tihbo duhtu chêt dan turah mipuiin an ngai lo hle niin a sawi.

Zoramthanga chuan, Congress sorkara hotu liante'n zu zawrh chu an hlâwkpui hle nia sawiin, "Chutih laiin kan ṭhalaite an liam zawih zawih thung. Zu rûiin police an hlau ṭhin kha a nia, tunah chuan zu rûi leh zu lei duhte’n police hmunpui an pan ta zawk a, police-te a za télin an thi zawih zawih mai a ni," a ti.

Kohran leh khawtlangin an duh lo chungin Congress sorkarin zu an zuar lui nia sawiin, Zorama chuan, "MNF party pawhin nasa takin zuar lo turin kan nawr reng a, an zuar lui ngar ngar a. MNF-in Congress kan tluk lohna em em chu zah an tuar chak em em hi a ni a, mipuiin kan dem rawn chungin an zak lo a, an inthlahrung chuang hauh lo," a ti a; Congress sorkar chu zu zawrh duh lo ang leh zu duh lo anga insawi chi an nih loh thu a sawi.

MNF President chuan, Septem-ber 15, 2016-a zu zawrh duh lohna kawngzawh an huaihawtah mipui thlawpna ṭha an hmuh avangin lawmthu a sawi a, "Tunlai khaw chin mumal lo tak karah Pathianin khaw
ṭha tak mai min pe a, Pathian hnenah lawmthu kan sawi tak meuh a. Kan thu leh hla min puanzarsaktu media-te chungah lawmthu kan sawi," a ti. Kawngzawh vanga harsatna tâwk an awm chuan ngaihdam a dil thung.