MNF sorkar tihchingpen siamṭhat hna kan thawk zel - Lal Thanzara

Minister Lal Thanzara chuan, kum 10 chhunga MNF sorkarin Mizorama hmasawnna hna thawh tur tam tak an tichingpen nia sawiin, "Keini'n a siam ṭhat hna kan thawk zel a ni," a ti.

Nimina Congress Bhavan-a inkhawmah Lal Thanzara chuan, MNF sorkarin Greater Aizawl Water Supply Scheme phase-II, Referral Hospital leh Tuirial Hydro Electric Power project-te tipuitling loin an tichhe vek niin a sawi a; chu'ngte chu Congress party a sorkar leh hnuah an chhunzawm a, an tipuitling mek tih a sawi.

Lal Thanzara chuan, Tuirial HEP chu June 2017-ah generator pakhat zawk tihnun a, July-ah pakhat dang tihnun tum a nih thu a sawi a, "Kum 2018 inthlan hmain Tuirial HEP aṭangin power generate ngei kan tum. Mahse, a panna kawngah harsatna a awm a, chu pawh chu a siamtu tur thlan a ni tawh," a ti.

Minister Thanzara chuan, PC party sorkar laiin Garden Colony hmangin apple leh elaichi an chìntir a, mahse, an sum ruahman cheng nuai 480 chu sorkar hotute'n an chèn ral nia sawiin, "Hlawhtlinpui an awm lo," a ti.

Chumi hnuah Congress party sorkarin NLUP an kalpui a, chhungkaw 10,000 chuang rangva in chung an pek bakah, ṭanpuina sum cheng 30,000 vel mi eng emaw zat an pe a, hlawhtlinpui tam tak an awm niin a sawi.

MNF party sorkarin BAFFACOS an kalpui chu mipuiin an chhawr loh thu leh MIP chu dinchhuahpui an awm loh thu sawiin, "MNF economic policy kha a hlawmchham a ni," a ti a; chumi hnua Congress sorkarin sorkar a NLUP kalpui leh tih sawiin, "Kan beisei aia tam sum Central-in min pea, hetiang hi khawvelah eng sorkar mahin an la nei ngai lo a, chhungkaw 1,30,000 hnenah hlawhtlinpui tham ṭanpuina pek a ni," a ti bawk.

Lal Thanzara chuan, NLUP-ah sum hman dik loh a awm theih thu sawiin, sangha chi supply chungchang pawh ACB-in an chhui mek thu a sawi a, chutih rualin, sum leh pai hman dik lohna lian tak a la awm lo niin a sawi. "Congress policy NLUP hi Pathianin mal a sawm lo tih chi a ni lo. Tute economic policy hi nge Pathianin mal a sawm tih mipuite'n kan ngaihtuah a ngai," a ti.

CAG Report-a lang, IMR motor lei chungchang sawiin, Lal Thanzara chuan, "IMR tihniamna tur sum aṭangin truck panga lei phalna min pe a, cheng vbc. 5.50 min pe a ni. Mahse, TATA agent-te'n tun thlengin min la pe thei lo. He thilah hian minister hmasa emaw, tuna minister emawin mawhphurhna kan nei lo," a ti a; TATA agent-te'n an tih tur an ti lo a, an vanduai a, chu chu an tuar tlang ta niin a sawi.