Lunglei Convention Centre hawng CM-in rinawm turin Mizo mipui a chah
Lunglei Convention Centre sak thar chu nimin khan chief minister Lal Thanhawla'n a hawng. CM Hawla chuan, Pathian thinurna tawng baw lo tur leh mahni awmna ṭheuha rinawm taka awm turin Mizo mipuite a chah.
Chief Minister chuan, Mizote zingah kut tling loa sum lak luh hreh lo an tam tak an awm thu sawiin, "Chung lam thinrimna kan tawng bua ang tih a hlauhthawnawm a, a thinrimna kan tawng buak loh nan Mizoram mipuite'n kan awmna hmun
ṭheuhah rinawm taka kan awm a ngai a ni," a ti.
Lal Thanhawla chuan, Tuirial Hydel Project pawh kuttling loa sum lak luh chingte vangin a hlawhtling lawk thei lo tih sawiin, "Tuirial HEP hi chhi daih tawh tur kan ni a, mahse kuttling loa sum lak luh chingte'n an tichingpen a ni. Mahse, tunah chuan hman theiha peih a ni ṭêp tawh," a ti a; Mizote chu kut tling loa sum lak luh ching hnam kan ni em, tih inngaihtuah a ṭul thu a sawi.
CM Hawla chuan, ngaihsak loh leh ngaihtuah loh nih a hrehawm hle tih sawiin, Mizoram sorkarin Lunglei chu a ngaihsak hle niin a sawi a; sorkarin a ngaihsak vanga lawm nacháng hre turin a chah.
Lunglei mipuite chu sorkarin hmansawnna ruhrel chi hrang hrang a siamsakte dimdawi taka enkawl turin a chah a, "Sorkar thil siamte hi kan enkawl thiam lo fo a, sorkar thilte hi kan ta a ni tih kan hriat a ngai a, dimdawi tak leh uluk taka kan enkawla kan hman a ngai a ni," a ti.
Lunglei Convention Centre hawnnaah hian UDPA minister Zodintluanga pawhin thu a sawi a; minister dang John Rotluangliana leh PC Lalthanliana, Lunglei HPC vice chairman S Laldingliana
leh MLA Chalrosanga Ralte-te pawh an tel.
Convention Centre sak nan hian Union Urban Deve-lop-ment Ministry aṭangin cheng nuai 1877.40 hmuh niin, nodal department chu UDPA department a ni a; a satu contractor chu Trilok & Associates niin, RCC steel structure-a sak a ni.
Building hi chhawng ruk a ni a, Railways ticketing counter, ruaiṭhehna hall, choka, mikhual thlenna tur pindan leh VIP leh VVIP-te thlenna tur pindan te, air conditioned nena thuam convention hall-te thil dang eng emaw zat a awm a ni.