Lirthei din phal lohna siam

Traffic SP C Lalthanmawia chuan thupek chhuahin,Tuivamit leh Tanhril (Ramrikawn) huam chhunga lirtheite tluang zawka an kal theih-na turin lirthei din phal lohna hmun a siam thar.

Traffic SP chuan, "Lirthei chevêl leh kawng hmangtu mipuite an him zawk nan te, Mizo-ram University lam pana lirthei kal leh haw lam tihziaawm nante leh FCI kudama lirthei lût leh chhuak leh chevel tihziaawm nan, FCSCA department leh Traffic Police hotu te, MZU JAC hruaitu te, Tuivamit leh Tanhril khawtlang hruaitute leh Mizoram Truck Drivers Association hruaitute an enfiah hnuah thupek hi chhuah a ni," a ti.

Thupek hi September 19, 2016 aṭanga thu leh awm hma chuan hman tur a ni a, August 26, 2016-a notification chhuah chu a luahlân ang.

Traffic SP ruahmanna thar

ω MZU leh Tanhril kawng péngṭhuam aṭanga MZU lam panna kawngpui dungah HMV (truck) din phal a ni lo. Hei hian Rintea huan péng aṭanga FCI kudam lam kawng thlang lamah truck pali din theihna leh Lalrosanga kawmthlang zâwn kawng thlang lama truck pahnih din theihna a huam lo.

ω Luangmual leh Tuivamit inkar kawngpui dungah HMV (truck) din phal a ni lo. Hei hian Geology & Mining Site Office bula Thanseia in zawn aṭanga khawthlang lamah HMV (truck) pariat din theihna a huam lo.

ω FCI kudam aṭanga MZU lam metre 100 (H Rozama building) leh FCI kudam aṭanga Ramrikawn lam metre 150 (Lalchunga building) inkar kawngpui sir tawn tawnah LMV leh a aia lian lirthei din phal a ni lo.

ω Ṭul bik thilah chuan Aizawl traffic police, FCI hotute leh Mizoram Truck Driver Association hotute inberáwnin ruahmanna siam theih a ni ang.