KHAWTHLIR

Thisen pe

Lunglei Higher Secondary School NSS unit-te chuan nimin khan blood donation camp an huaihawt a, Lunglei Civil Hospital tan mipa 34 leh hmeichhia 18 ten thisen unit 52 an pe.

MzSRLM hawng

September 15, 2016 khan Sangau RD Block tan Sangau-ah Mizoram State Rural Livelihoods Mission (MzSRLM) hawn a ni a, Lawngtlai district-a a hmasa ber tur a ni. MzSRLM hawnna inkhawm hi Sangau BRC Hall-ah neih a ni a, Sangau BDO Vanlal-
ṭanpuia'n a hawng.

Free Clinic

National Urban Health Centre, Sazaikawn leh Lunglei Venghlun Village Council ṭangkawp chuan nimin Venghlun Indoor Stadium ah free health clinic an nei a, mi 110 an inentir. Free clinic hi bialtu MLA Chalrosanga Ralte chuan tlawhin damlo inentir damdawi leina nei lote leisak nan medical team hnenah Rs. 5000 a hlan.

NLUP sem

Horticulture department chuan nimin khan Kolasib leh Serlui bial chhunga NLUP dawngtute hnenah ṭanpuin an sem. NLUP sem inkhawm hi Kolasib-ah bialtu MLA PC Zoram Sangliana leh Serluiah bialtu MLA K Lalrin-thanga ten an hmanpui.

Kum 70-na lawm

Pilêr Branch YMA chuan nimin khan an khaw community hall-ah an branch kum 70 tlin an lawm a, bialtu MLA Vanlalawmpuii Chawngthu-in a hman pui. Pilêr khuaah hian in 80 awmin, mihring 500 vel an cheng a, YMA member 370 (mipa 133, hmeichhia 137) an awm a ni.

Heroin man

CID Crime-a Special Narcotics PS leh Lung­leia BSF DCG ṭang dun chuan, nimin tlai dar 3:30 khan Ramhlun Venglaiah heroin gram 139.8 an man a, a neitua puh Vanlalhriati (28) d/o NK Awii, Sesih, tuna Ramhlun Venglaia cheng mek an man bawk. Heroin hi Rs. 4,14,000 hû a ni.