Pollution chungchang sawihona neih a ni

Mizoram Pollution Contriol Board (MPCB) chuan, nimin khan PCCF Conference Hall-ah pollution chungchanga inràwnkhawmna an buatsaih a, Mizorama pollution siamtu hrang hrangte'n hriat loh hlâna taksa leh boruakah harsatna a siam tawh dante sawiho a ni.

Inràwnkhawmna hi MPCB member secretary C Lalduhawma'n a kaihruai a, MPCB chairman RC Thanga'n a hmanpui.

Bawlhhlawh chi hrang hrang - tui, boruak, damdawi-in leh chhungkaw bawlh-hlawh, bengchheng, plastic bawlhhlawh leh a dangte titlêm tura dân ṭha tak awmte chu a mawhphurtu hrang hrang roreltu, sorkar department, private institution, MPCB leh mipuite’n an mawhphurhna ṭheuh an hriat chian lehzual a ngaih thu an sawi.

Meeting chuan, bawlhhlawh paih vûm aṭanga harsatna awm theite tihtlêm a nih theih nan mi tinin ṭawih thei chite mahni inah leh huanah emaw, pangpar pot-ahte emaw phûm/dahkhawm a, leiṭha siam nan inzirtir leh, ṭawih thei lote chu hralh leh theih tura buaipui ṭha an ti a ni.

Ran vulhna bawlh-hlawh te, khawpui hmélhmang timawi lo khawpa hrui inzamte chu thuneitute’n en fel thei se an duh thu an sawi bawk.