Mualthuam North Supply kudam hawng

Mualthuam North leh a chhehvel khaw pahnihte châwmtu tur, Mualthuam North-a buhfai kudam siam thar chu Ningani tlai khan Food, Civil Supplies & Consumer Affairs minister John Rotluangliana'n a hawng.

John Rotluangliana chuan, state dangah chuan Food Security Act-in a huam chinte bakin ration buhfai an la ngai lo tih sawiin, "Mizoramah chuan ration-a innghat kan tam avangin a theih ang angin mi tinin kan dawn theih turin hma kan la mek a ni. Hetih lai hian, Mizote hi rinawmna tlakchham lai kan nei ṭhin a, nau piang an awm hlekin chaw pawh a la ei theih hmain birth certificate nen ration dawng nghal turin kan phí chung ṭhin a, kan inenfiah a ngai hle," a ti.

Horticulture minister PC Lalthanliana pawhin thu sawiin, Mual-
ṭhuam khua chu an vanneih thu a sawi a; kudam hawn thar chu mahni ta a ni tih hria a, dimdawi taka enkawl turin mi-puite a chah.

Kudam hawn tak hi NABARD scheme hnuaia Warehouse Infrastructure Fund aṭanga sum hmuh cheng nuai 120 sênga sak a ni a, buhfai quintal 3,500 dah theihna tur a ni. Kudam bakah hian, store keeper, chowkidar leh thawktu dangte chenna tur sak tel a ni.