KHAWTHLIR

ṬKP, Thingkah unit chuan nimin khan Lawngtlai District Hospital blood bank-ah thisen unit 8 an pe a, petute mipa pasarih leh hmeichhia pakhat an ni. 

Zoram Medical College (ZMC)-a Covid-19 Testing Laboratory-ah Thawhlehni leh nimin khan swab sample 16 endik a ni a, Covid-19 an kai lo vek tih an finfiah. Thawhlehni khan sample 11 endik a ni a, nimin khan panga endik leh a ni. Sample test-te chu Covid-19 vei mek enkawltu doctor leh nurse 14-te leh ZMC-a low risk ward-a enkawl mek mi pakhat an ni. 

Covid-19 vei vanga State Referral Hospital ICU-a enkawl mek mi pakhat chu a dinhmun a ṭha hret hret tih ZMC-SRF Covid-19 Bulletin nimin tlaia chhuak chuan a tarlang. Enkawl mek tana ṭawngṭai zel turin mipui an sâwm nghal a ni. 

Former Legislators Association of Mizoram chuan, an member Hiphei a thi chu an ui thu leh a chhungte Pathianin thlamuan se an duh thu an tarlang. FLAM president KL Rochama chuan, Mizoram Assembly hmasa bera member 33 zingah mi 10 chiah an la dam tih a sawi a; chu'ngte chu - Sapliana, K Sang Chhum, Saitlawma, KL Rochama, Lalkunga, H Thansanga, RD Sangkhuma, R Dotinaia, Chawngkunga leh KC Thakuri te an ni. 

Khawzawlah thlai vawn ṭhatna tur cold room hman theih turin ruahman mek a nih thu sorkar thuchhuah chuan a tarlang. Cold room hi Horticulture departmentin MIDH scheme hnuaia an sak a ni a, pindan pathum awmin, pindan tinah thlai quintal 80 ṭheuh a leng. Power & Electricity departmentin power transformer an buaipui mek a ni. 

Mizoram Cooperative Apex Bank chuan Covid-19 donaa sorkar thâ tihchakna atan nimin khan Chief Minister’s Relief Fund-ah Rs. 10,00,000 an hlân a; Indian Dental Association, Mizoram Branch pawhin Rs. 2,06,500 an thawh. Human Resources Development hnuaia department - School Education, SCERT, DIET leh Samagra Shiksha-a thawk zawng zawngin an thawh khawm Rs. 1,28,63,000 chu Thawhlehni khan an hlân bawk.