MP leh Speaker hlui Hiphei a thi

Rajya Sabha MP hlui leh Mizoram Legislative Assembly speaker hlui Hiphei (82) chu nimin zing dar 7:45 khan Aizawl Civil Hospital-ah stroke leh pneumonia vangin a thi a, vawiinah Siahaah ECM Assembly moderator Rev.Dr FC Beichņ-in a vui ang.

Hiphei hi August 23, 1937-ah Siaha district-a Chapui khuaah a piang a, a nupui Sathlie nen fanu 2 leh fapa 3 an nei. Politics-a a luh hnuah Congress party ṭangin MP leh MLA a ni. MLA inthlanah kum 1972, 1978, 1979, 1984, 1987, 1989 leh 2013-ah INC ticket vekin thlan tlin a ni a, kum 1972-ah hian deputy speaker a ni.

Kum 1984-a Congress sorkarah minister of state a ni a, kum 2013-ah Assembly Speaker a ni. Parliament-a upper house Rajya Sabha-ah term hnih - kum 1990-1996 leh kum 1996-2002 chhung member (MP) a ni a; MADC sorkarah chairman a ni tawh bawk.

Kum 2018 khan Congress party chhuahsanin BJP a zawm a, BJP Mizoramah Core Committee member a ni. Kum 2018 inthlanpuiah Palak bialah BJP ticket-in a ding leh a, a tling zo lo. Hiphei ruang hi nimin chawhma dar 11 khan Mara House-ah thlah a ni a, thlahnaah hian Assembly speaker Lalrinliana Sailo-in thu a sawi a, minister leh MLA eng emaw zat an tel. Siaha bialtu MLA Dr K Beichhua, minister of state-in Siahaah a zui phei a ni. Hiphei hi a awm mekna party BJP, Congress party leh MNF party-te chuan an ui thu leh an sūn thu an tarlang.