CM-in Multi Disciplinary Training Centre a hawng

Health & Family Welfare department hnuaia Multi Disciplinary Training Centre, ITI Veng a mi chu nimin khan chief minister Zoramthanga'n a hawng. He centre hi Infant Mortality Rate (nau piang 1000 zela thi zat) tihhniam kawnga Mizoram a thawh ṭhat avanga sorkar laipuiin incentive grant a pek aṭanga bulṭan a ni.

Chief Minister chuan medical mite tana training centre, thiamna belhchhah mai baka ngaihtuahna hmanna tura inzirtirna hmun buatsaih a ni chu lawmawm a tih thu sawiin, "He centre siam a nih theihna atana hun hma lama hma lo latute chungah lawmthu ka sawi a ni. Thiamna leh hriatna awmsa ring ringawta khawvel hi kal tur kan ni lo. Kawng tinrenga vision siamsak tura intuhna hmun lo ni se, ṭangkai taka mipui leh state tana thawhhlawk tura inbuatsaihna hmun a nih ngei ka beisei," a ti.

Covid-19 avangin ram hmasawnna hna dang pawh thawk tam thei lo in, damkhawchhuah ngaipawimawh hmasa bera nei chunga inrelbawlna kalpui a ṭul tak thu sawiin Zoramthanga chuan, "Harsatna hrang hrang awm mah se, vawiin thlenga chaw nghei loa kan awm hi a lawmawm hle," a ti a, hrileng do tura an hmalakna-ah mipuite chungah lawmthu a sawi.

Khualzahawm Health minister Dr R Lalthangliana chuan Covid-19 hmachhawn kawngah Mizoram chu India rama ti ṭha ber a nih thu sawiin, "Hetiang dinhmun kan thlen theih chhan hi Chief Minister hmalakna vang leh Health department leh mipui ṭawiawmna vang a ni. Vawiina training centre hawn tak pawh health lama thawktute hmalak ṭhat vanga awm thei a ni," a ti a, ṭang taka hna thawk zui zel turin thawktute a chah.

Multi Disciplinary Training Centre hi IMR tihhniam kawnga incentive grant kum 2015-2016 a dawn cheng nuai 1875 aṭanga sak ṭan a ni a, a zawh felna atan state aṭangin aṭangin sum dawn a ni bawk. RCC building chhawng nga niin, classroom pali, recreation room, director room, video conferencing room, faculty room, library, auditorium, kitchen, dining hall, 

recreation room leh thildang dangte a awm.