Khelo India State Centre of Excellence

Union Sports minister Kiren Rijiju chuan Thawhlehni tlai khan video conferencing kaltlangin Mizoram leh state dang pasariha Khelo India State Centre of Excellence a hawng. 

Kiren Rijiju chuan state pariata centre of excellence hawn a ni ta chu sports hmasawnna duhawm tak a nih thu sawiin, "India ramah sports culture kan neih theih nana bulṭanna ṭha tak a ni. Prime Minister  hmathlir (vision)-ah India chu sporting nation a siam a tel," a ti.

Sports minister Robert Romawia Royte chuan RG Sports Stadium-a Khelo India State Centre of Excellence hawn a ni ta chu Mizoram tan hun lawmawm leh ni chhinchhiahtlak tak a nih thu a sawi.

Khelo India State Centre of Excellence hawnna state dangte chu Arunachal Pradesh, Kerala, Karanataka, Manipur, Nagaland, Odisha leh Telangana-ah a ni. Centre of Excellence tinah hian sports discipline 3 zel thlurbing niin Rajiv Gandhi Sports Stadium a Centre of Excellence ah chuan boxing, judo leh weightlifting discipline-te dah a ni dawn. Kum 4 chhunga heng centre mamawh tur zawng zawng - ruhrel, coaching leh training atana pawimawhte sorkar laipuiin a ruahman tawh.

Khelo India State Centre of Excellence a taka kalpui thuai a nih theihna atan Sports minister Robert Romawia chuan nimin zing khan RG Stadium a tlawh a, hmalak dan tur a enfiah.