Leimin vangin mi panga an thi Sorkarin Rs. 4,00,000-in a râl dawn

September 16, Zirtawpni zan zanlai pelh hnua ruahsur nasa vangin Mizoram hmun hrang hrangah chhiatna a thleng a; Tlungvel khuaah chuan leiminin in pathum a hnâwl a, mi pangain nunna an chán. Mi thite hi Mizoram sorkar chuan cheng nuai 4 ṭheuhin a ral dawn.

Tlungvel Vengthara Lalro-siama (38) te in chu kawng chhak lama leiminin a hnâwl a, in chhunga awm Lalrosiama, a nupui Lalsangpuii (40) leh an fanu Lalhruaii (4) te an thi a, an fapa Laldingpuia (11) erawh chu hliam chungin kawngpuiah a vâk chhuak a, damdawi-inah enkawl a ni. Lalrosiama te ṭhenawma in pawh leiminin a hnâwl a, mahse, leimin hmain an hlauhthawn vangin an tlan chhuak hman.

Lalhruaii ruang hi zing dar 7:30 velah in chimna thlang lawkah hmuh a ni a, a thlangah Lalsangpuii ruang hmuh niin, a hnuhnung berah Lalrosiama ruang hmuh a ni. Aizawl lama Lalrosiama te in thlen hmaah pawh hmun pahnihah leiminin kawng a hnawh a, hun eng emaw chen lirtheite an tangkhang hnuah thenfai a ni.

Tlungvel Gate Vengah Chhawn---veli (52) te in pawh September 16 zanlaiah tho hian leiminin a hnawl a, he ina cheng Chhawnveli leh a fapa Rinṭhuama (23) te an thi. In chhiate hi khawtlang mipuite'n senghawi hna an thawk nghal a ni. Ruangte hi police leh doctor-te'n an endik hnuah Inrinni khan vui an ni.

Tlungvel khuaa chhiatna thleng hi Inrinni khan Health minister Lal Thanzara, Disaster Management & Rehabilitation minister C Ngunlianchunga leh govt. deputy chief whip RL Pianmawia ten an tlawh a; vanduaina tuartute chu sorkarin a tawrhpui takzet thu an sawi.

Sorkar hotute chuan, leiminin in a hnâwlsakte chu Rs. 1,01,900 ṭheuh leh rangva bundle li pek an nih tur thu an sawi a; mitthite chu mi pakhat Rs. 4,00,000 zela ràl an nih tur thu an puang. C Ngunlianchunga chuan, chhawmdawlna hna thawktu hnatlangte ei leh in senso atan YMA hnenah Rs. 10,000 a pe a ni.

Aizawl khawpui chhungah pawh leimin vangin chhiatna a thleng nual a, in chim leh thlanmual minte pawh a awm. In chim vanga thi leh hliam dang erawh an awm loa thu dawn a ni.