KHAWTHLIR

Thisen pe

Inrinni khan Bethlehem Branch KṬP chuan Sy­nod Hospital tan thisen unit 37 an pe a, a petute mipa 34 leh hmeichhia pahnih an ni. Bethlehem Vengthlang Branch KṬP-in an din champha pualin Aizawl Civil Hospital tan unit 38 an pe a, a petute mipa 30 leh hmeichhia pariat an ni a; Khawlailung Student Union, Aizawl-in Aizawl Civil Hospital-ah thisen unit riat an pe bawk.

Biak-in hawng

Republic Vengthlang Baptist Kohhran biak-in sak thar chu Inrinni khan Baptist Church of Mizoram president Rev. Lalthangliana Hnamte-in Pathian hnena hlanin a hawng. Biak-in thar lawm nan inkhawm an hman bakah, tlaiah ruai an ṭheh. Republic Vengthlang BCM Kohhran hi September 4, 1987 zanah Aizawl Town Church aṭangin a indang a, an biak-in thar hi a dung ft. 70 leh a vâng ft. 40-a zau niin, a sak nan Rs. 1,01,40,016 an hmang a ni.

MUP jubilee lawm

Mizo Upa Pawl (MUP), Vanhne unit chuan Inrinni khan Vanhne Middle School-ah an kum kum 25 tlin, silver jubilee) an lawm a, bialtu MLA Chalrosanga Ralte-in a hmanpui. Vanhne MUP chuan an khuaa nupa inneih golden jubilee thlengte hnenah chawimawina an hlan a, Chalrosanga Ralte-in kum 80 tlingte hnenah lawmpuina Rs. 500 ṭheuh a hlan bawk. Vanhne-ah hian MUP member 60 chuang an awm.

Senior inkhawmpui

Presbyterian Kohhrana Senior department-te chuan nimin khan bial hrang hrangah inkhawmpui an hmang. Inkhawmpui hi bial tam zawk chuan intihsiakna atan an hmang lo a, bial ṭhenkhat erawh chu an intihsiak thung. Pathian thu leh hla leh thil dangte hmangin Pathian an chawimawi a ni. Kuminah hian MSSU hnuaia Senior department-ah zirtirtu 4,558 leh zirlai 30,191, an vaiin 34,749 an awm.

Line siam tha

Serchhip aṭanga Lunglei, Lawngtlai leh Siaha district-te kawlphetha pêkna, 132 KV line, September 15, 2016 zan dar 11 vela chhia chu Septem ber 17 chawhnu dar 2:30 khan siam ṭhat a ni a, Mizoram chhim lamah kawlphetha pek leh nghal a ni.