Lungleia municipal din turin kan inpeih tawh - CM Lal Thanhawla

Chief minister Lal Thanhawla chuan, Mizoram sorkar chu Lungleia municipal council din turin a inpeih thlap tawh niin a sawi.

CM Lal Thanhawla hi Lunglei Municipal Steering Committee (LMSC) hruaitute chuan Sep-tember 17, 2016 zing khan Lungleiah an hmu a, Lungleia municipal council din dan tura ruahhmanna an neihte an sawipui. CM hi Lunglei High Powered Committee (HPC) vice chairman S Laldingliana'n a ṭawiawm a ni.

LMSC tarlan danin, Chief Minister an hmuhnaah hian Lal Thanhawla chuan, Lungleia municipal council din turin Mizoram sorkar a inpeih tawh nia sawiin, "Central lamin an tih leh tih lohte pawh a ni ang a, tun dinhmunah chuan mipuiin kan la zawh kan rin loh deuh avangin kan zir chiang a, referendum-te pawh lak a ngaih a rinawm," a ti.

HPC vice chairman S Lal-dingliana pawhin, Lung-leia mu-nicipal council din chung-changah zau zawka inràwnkhawmna neih a pawimawha a hriat thu a sawi.

Mizoram chhim lama airport siam chungchangah Chief Minister chuan, chhim lamah
ṭhlawhna ṭumhmun dah ngei a duh thu sawiin, "Aviation Wing lamin technical lam an ngai pawimawh si a, an duhkhawp kan hmu lo a nih pawhin, ATR (thlawhna tê chi) ṭumna tur tal kan zawng zel ang. Kàwmzáwl pawh kan survey nawn leh ang," a ti.

Lunglei by-pass road siam thuai tura an ngenna chhangin, Lal Thanhawla chuan, Mizoram sorkar ngaih pawimawh, priority list zinga mi a nih thu a sawi a, "Central-ah kan thlen tawh a, ngaihchân mek a ni," a ti. Chhim lam kawng chhia te, border trade leh police station leh fire station-te, sum awm vek tawh tun thlenga la sak lohte chu lo ennawn a tum thu a sawi bawk.

LMSC hruaitute chuan Inrinni vêk khan municipal council din chungchangah UDPA minister Zodintluanga leh director Zorammuana te pawh an hmu a; UDPA Minister chuan adhoc body-a din tum chungchang an zawhna chu, Constitution siama zir chiangtu tur din ṭha a tih thu a sawi.

Zodintluanga chuan, sorkar laipui aṭanga sum lo kalte chu Lunglei tan chawm bawk a, hâwp bawk a rem reng dawn lo tih sawiin, thingtlang leh khawpui atana sum ruahmante chu hman kawp reng theih a ni dawn lo tih a sawi a, "Urban leh rural thliar hrante pawh a ṭul tihna department ang chuan kan nei tawh ṭhin a, mahse, Urban Local Body-te'n MGNREGA an chàn a ngai dawn. Chuvang chuan, municipality hi chu tun ai hian kan sawi zau a, kan inhrilhhriat a pawimawh," a ti.