Vanglaini zirchianna Parking fee tender chhannaa thu inchuh

Aizawl Municipal Corpo-ration (AMC)-in kum 2016-17 chhunga Aizawla parking fee khawntu tur a thlan danah PRISM-in ACB-ah FIR an thehlut a; PRISM president Vanlalruata chuan PIL thlenga kal zel an tum thu a sawi. Parking fee khawntu thlannaah a tir aṭang-
in a chháng sâng ber an thlang ngai kher loa thu dawn a ni a; parking fee khawntu pahnih chuan tun hnai khan tender an chhanna zat tihhniam an dil leh mek nia thu dawn a ni bawk.

PRISM lam thu

AMC sorkar term hmasa aṭanga parking fee khawn tur thlannaa Terms & Conditions anga tender chhangtu zinga a sang ber an thlan bik loh laia PRISM-in hma an lak loh chhan zawhna chhangin President Vanlalruata chuan, "Term hma-saah kha chuan kan buaipui vak lo a, a dik lo tih kan hre bik lo. Report a awm loh chuan kan hre mai thei bik lo a ni," a ti.

ACB-a FIR an thehluh chhan sawiin, "Insiam ṭha se kan duh thu kan sawi a, insiam ṭhat a hnêkin insawifiahnate an rawn siam a, UDPA Minister hnenah kan thlen leh a, sorkar aṭangin hmalak zuina âwm kan hriat loh avangin FIR kan thehlut ta a ni," a ti a; parking fee khawntu thlan danah induhsakna a awm ṭhin tih an hriatthiam rualin, tuna an induhsakna chu a lutuk nia an hriat thu a sawi.

Vanlalruata chuan, ACB-a FIR an thehluhte chu ACB lamin a bawhzui ṭha nia sawiin, "FIR kan thehluh tawh zingah investigation an ti zel a, thubuai pahnih emaw chu hma an la lo a, pakhat chu MLA dâwt bill kha a ni. ACB hian chhui mah se, a hmáwrbàwknaah action lak a awm ngai lo a, hei hi a buaithlak lai tak a ni," a ti.

PRISM hian September 7, 2016 khan parking fee khawn tur thlan dan vangin AMC lakah ACB ah FIR an thehlut a ni.

Terms & Condition

AMC-in parking fee a khawn hi kum 2012-ah kalpui ṭan a ni a; parking fee collector thlan danah hian tender an chhuahna leh a chhangtu an thlan dan enin, tender chhang sang ber an la vek lo.

Parking fee Terms & Condi-tions hlui zawkah chuan, 'A chhang sang ber emaw, a hniam ber emaw kher thlan tur a ni lo a, a thlangtuin thlan âwma a hriat a thlang thei ang,' tih a ni. Kum 2016-a Terms & Conditions an siam tharah chuan, 'He hna thawk tur hian mi tling leh ṭha thlan tur an nih avangin, a chhang sang ber thlan tur tihna a ni kher lo,' tih a ni thung. Kum 2012
aṭanga 2016 thlengin AMC hian Terms & Condition anga tender chhang sang ber an thlan vek loh avangin kum tin sum an hloh ziah tawh a ni.

AMC Mayor sawifiah

Vanglaini zawhna chhangin AMC mayor PC Lalhmingthanga chuan, "Tender chhangtu zinga a sang sang la ta ngawt ila, kan lakte hian khawn thei leh si lo se, tender chhuah ṭhat leh a, buaipui leh zel a ngai dawn a. Tunah pawh contractor pahnih chuan tihniam turin an rawn ngen leh nghal tawh a, tihhniam ngen tum dang pawh an awm tih kan hre leh tawh bawk a ni," a ti.

Parking fee khawntu, area no. 7 changtu, K Lalhriatkima, Bungkawn Vengthar chuan Mis-sion Veng leh Mission Vengthlang chu thla khatah Rs. 1,500-in a chháng a, tun hnai khan ziakin AMC Mayor hnenah tihhniam a dil a ni. Parking area no. 30 changtu H Lalnunmawia, Saron Veng pawhin Electric Veng, Aizawl Venglai leh Ramthar Vengte a chang a, thla khatah Rs. 3,700-a a chhan leh AMC-in an pawm tawh chu tun hnai khan ziakin Rs. 1,900-ah tihhniam a dil bawk.

Mite pahnihte dilna hi AMC chuan an la ngaihtuah lo. AMC-a parking fee contractor-te hun chu kum khat zel a ni.

AMC Mayor sawi danin, kumin April leh May khan AMC official-te'n parking area hrang hranga parking fee khawntute chu contractor-te hriat lohin an zir chiang a, area hrang hrang dinhmun an enfiah. Zir chian-na chu June 8, 2016-a AMC Board of Councillor meeting-ah ngaihtuah niin, official-te rawtna parking rate chu pawm a ni.

PC Lalhmingthanga chuan, tender chhang sáng apiang an lak loh chhan dang sawiin, "Parking area ṭhenkhat chu tihzìm a, line fel taka rîn a ngaih dawn avangin chu'ngte chu kan ngaihtuah lâwk a, kum dang zawng aia tender chhangtu an pung a ni," a ti.

AMC record

AMC aṭanga thu dawn danin, kum 2012-ah Aizawlah parking area 40 a awm a, tender chhangtu zinga a sáng ber thlan lohna area 20 (50%) a awm. Thla khata area ṭhenkhata sum an hloh tamna bera ngaihah Rs. 13,000 an hloh. Kum 2013-ah parking area 58 a awm a, tender chhangtu zinga a sáng ber thlan lohna area 24 a awm; chumi vanga thla khata sum an hloh tamna berah Rs. 14,000 an hloh anga ngaih theih a ni. Mi pakhat chauhin a chhanna area 18 a awm bawk.

Kum 2014-ah tender chhang sáng ber thlan lohna area 20 a awm a, mimalin an chhanna bik area 17 a awm. Kum 2015-ah parking area 58 awmin, tender chhang sang ber aia a hniam zawk an thlanna area 19 a awm a ni. Kum 2016-ah parking area 58 awmin, tender chhan sang ber thlan lohna area 42 a awm a, tender chhangtu zingah Rs. 1,00,000 aia tama chhangtu mi pathum an awm a ni.

Tender chháng sáng ber

lak loh vanga AMC sum hloh

Kum Thla khata Kum khata

Sum hloh Sum hloh

2012 Rs. 52,900 Rs. 6,34,800

2013 Rs. 51,910 Rs. 6,22,920

2014 Rs. 39,651 Rs. 4,75,812

2015 Rs. 90,700 Rs. 10,88,400

2016 Rs. 2,73,070 Rs. 32,76,840