Covid-19 No Tolerance sawiho

Kolasib bawrhsap Dr H Lalthlangliana hoin nimin khan a pisaah 'Covid-19 No Tolerance Fortnight' chung­chang damdawi lam mi te, venhimna lam kengkawh-

tute leh YMA hruaitute nen an sawiho.

Dr H Lalthlangliana chuan, contact tracing chu Covid-19 darh zel tur vèn nana rálthuam pawimawh a nih thu sawiin, "Contact tracing ngaite'n thuneitute hnenah an kal kualna kimchang takin an thlen ṭhin a pawimawh. Contact tracing chungchanga kan mawhphurhnate hlen chhuah hi Covid-19 kan do theihna a ni," a ti.

Kolasib DC chuan, Covid-19 chungchanga sorkar inkaihhruainate chu uar zawka inzirtirna chhunzawm a ṭul thu sawiin, "Hemi kawngah hian VTF-te nena thawhhona ṭha neih a pawimawh," a ti a; khaw hrang hrangah aurinna hmanga Covid-19 chungchanga invenna leh fimkhur a ngaihna lai puan tam a ṭul thu a sawi.

Ṭhutkhawmah hian Covid-19 No Tolerance Fort­night chhunga an district-a inkaihhruaina hrang hrangte thlirho a ni a, khauh taka kenkawh an rél a ni.