Armed Vengah lei a tlahniam

Tun hnaia ruah sûr nasa vang-in Armed Venga lei che ṭhin chu a che leh a, hmun pakhatah chuan lei a tlakhniam avangin in pakhat ṭhiah a ni.

Lei tlahniam hian step leh kawng a tlakpui a, lei tlâk-hniamna bul hnaia in pakhat chu dinhmun hlauhthawnawma a din avangin khawtlangin an ṭhiahsak. Lei hi a tlahniam zel a nih chuan a bul hnaia inte tan pawh a hlauhawm tura ngaih a ni. Lei tlahniam bakah hian, hmun eng emaw zatah lei a khì a, step-te pawh lei khi vangin a chat a ni.

Armed Vengah hian kum 1998 velah lei a che ṭan a, kum 2003 khan hmun eng emaw zat-ah lei a khîk bakah a tlahniam a, hei vang hian in 10 chuang ṭhiah
niin, in eng emaw zat chu a ṭhen-
lai ṭhiah a ni. Leikhi huam chhungah hian in 100 vel a awm.

Kum 2003-a harsatna a thlen hnuah luikawrah check dam siam a ni a, chumi hnuah hun eng emaw chen chu lei che tawh lo a; mahse, check dam hi a chhiat tawh avang-in kum 2014 vel khan lei a che leh ṭan a, tun hnaia ruah sûr nasa vangin lei a che nasa lehzual a ni.

Armed Veng Local Council chairman R Vanṭhuama chuan, lei che zel tur vên thuai a nih loh chuan harsatna lian zawk a thlen a hlauhawm thu a sawi a, "Lei che zel tur ven a nih theihna atan theihtawp kan chhuah dawn a ni," a ti.