Revenue notified town 78 a awm mek Dan hriat loh vanga ram chinfel har a awm ṭhin

Land Revenue & Settlement (LRS) department hnuaiah Mizoramah notified town tia puan khaw 78 a awm mek. Hetih lai hian, LRS department hotute chuan, V/C tam takin dân an hriat loh vanga ram an pek mai ṭhin avangin chinfel a hautak thei hle tih an sawi.

LRS department hotute chuan, "Mizoram hmun hrang hranga V/C-te'n an khua ṭheuha mipuite hnena ram an pek danah ram pek theihna dân awm lo chunga an pek ṭhin vang te, ram inpek thuah a tam vang leh ram an pek dân chhinchhiah ṭhat tawk loh vang leh chhan hrang hrang vangin ram buai a tam phah hle," an ti.

LRS hotute sawi danin, Lushai Hills District (House Sites) Act 1953 Section 3(1) leh (2) hnuaiah Aizawl, Lunglei, Tlabung, Sairang, Kolasib, Champhai leh North Vanlaiphai tih lohah chuan V/C-te'n an huam chinah in hmun an pe thei a; sumdawnna atana ram (commercial area) hrang hrang - dawr, hotel leh sumdawnna atana hmanna tur reng rengah ram an pe thiang lo thung.

Agriculture land reng rengah V/C-te'n ram an pe thei lo tih sawiin, LRS department hotute chuan, "Mizo district (Agriculture Land) Act, 1963 & Mizo District (Agriculture Land) Rules 1971 ang chuan administrator leh administrator-in ziaka officer a ruat bikte chauhin huan lo ram an pe thei. He dân hnuaiah hian V/C-te'n huan ram an pek theih thu sawi lan a awm lo. Ram hi temporary allotment (pass/permit) emaw, permanent allotment (periodic patta/patta) hmanga pek tur a ni a, V/C chhunga dilna lut erawh V/C kaltlangin VCP hriatpuina nen thehluh tur a ni," an ti.

Kum 2013-ah The Mizoram (Land Revenue) Act, 2013 siam thar a ni a; chu dan ang chuan LRS department-in town leh sub-town area-a a puan tih lohah chuan V/C-te'n an huam chhungah in hmun atan chauh a mamawhte hnenah ram an pe thei. Ram an pek theih chin chu chhungkaw pakhatah square metre 111.5 emaw, sq.ft. 12,000 aia zîm lo, bigha khat emaw, sq.m. 1337.8 aia zau lo a ni.

Revenue department hotute chuan, Mizorama V/C tam takin ram inpek danah an thuneihna an hre tâwk lo nia sawiin, "Revenue department dân hriat leh zawm kawngah tun hma nena khaikhin pawhin V/C-te hian dân hriatna kawngah nasa takin hmasawn tawh mah se, nasa lehzuala ṭan lak a la ngai," an ti.

LRS hotute chuan, "Ram inpekah V/C-te'n thuneihna an neih loh laiin, VC tam tak chuan ram an pek nasat avangin Revenue dân aṭang chuan hmalak theih a ni lo," an ti a; The Mizoram Land Revenue Act, 2013-in a sawi angin, V/C-te'n danin a phal piah lamah ram lo pe ve mah se, dân aṭanga tehin ram neitu (land holder) an nih loh avangin Revenue department chuan hma an la thei lo tih an sawi.

V/C tam tak chu an kalphung a mumal tâwk lo tih sawiin LRS hotute chuan, "V/C-te'n ram an lo pek ve hian V/C term zo se, V/C thar an awm hnuah term hmasaa mite'n ram an pek kha a hnung zawka mite'n pek thuah an chíng a, hei hi ziaka felfai taka an chhinchhiah loh vang a ni," an ti. V/C-te ram pek thuah a awm fo avangin zangnadawmna dil a ṭul hunah a buai phah fo niin an sawi.

Revenue department hotute chuan, Mizorama dân anga ram inpek emaw, LSC pawh ni se, ram neituin a enkawl
ṭhat loh vanga ram buai a tam phah niin an sawi a, "An enkawl thei lo a nih pawhin, a chhinchhiahna boundary pillar emaw tal siam se, hmalak a ṭul hunah a awlsam," an ti a; ram inpek thuah a awm loh nan tun hnai aṭangin Geographical Information System (GSI) hmanga update zel a nih thu an sawi bawk.