Kolasib Hospital inbuatsaih dan enfiah

Sorkar damdawi-in fai inelna, Kayakalp hnuaia Kolasib District Hospital hmalakna leh inbuatsaih dan nimin khan Kolasib DC H Lalengmawia hoin khaw-tlang hruaitute'n an endik.

H Lalengmawia chuan, kum hmasaah Kolasib District Hospital-in hmanrua a neih kim loh vanga pakhatna a ni pha lo chu pawi a tih thu a sawi a, "Kuminah chuan a ti ṭha ber ni thei turin
ṭan lak a ngai. Khawtlang mipuite leh official-te thawhhona ṭha avangin pakhatna kan nih ngei ka beisei," a ti.

Kolasib DC ho hian damdawi-in hmun-hmá vawn fai dan te, bawlh-hlawh sawngbawl dan te, inthiarna vawn fai dante leh khawl dinhmunte enfiah a ni. Damdawi-in fai inbuatsaihna kal mekah hian tlawmngai pawl, sikul naupang leh mimalte'n damdawi-in leh a chhehvel an tifai ṭhin.