MLPC Act-a thutlukna siam turin a la hma deuh- Review Committee

MLPC Act zir chiang a, thlir lettu tura din Review and Evaluation Committee chuan MLPC Act zir chiang turin a la hma deuhin an hria a; Committee hnuaiah hian Study Group din ṭha an ti.

Excise & Narcotics secretary Benjamina'n Vanglaini palai zawhna chhanga a sawi danin, Review and Evaluation Committee hi vawi khat an ṭhu tawh a; thutlukna mumal siam ni lo mah se, thil pawimawh hrang hrang sawiho a ni. Meeting-ah chuan, Excise & Narcotics Secretary-in enforcement lama an hmalakna leh an department dinhmun a sawi hnuah member-te'n an ngaihdan an sawi.

Member-te'n an ngaihdan an sawinaah, MLPC Act ṭhat leh ṭhat loh chungchanga thutlukna siam tur chuan hman a nih aṭangin hun a la rei lo deuha an ngaih thu an sawi hlawm.

Thutlukna siamna atana a la hma deuha hriat a nih avang hian Committee hnuaiah hian uluk taka zir chiangtu tur Study Group din ṭha tih a ni a, mahse, din a la ni lo. Ṭhutkhawm leh hunah Study Group din tum a ni dawn a, member turah thutlukna siam a la ni lo.

Review and Evaluation Committee hi July 2016 laihâwl khan din a ni a, Excise & Narcotics Minister chairman a ni. Sorkar aṭangin Excise & Narcotics Secretary, Commissioner, Deputy Commissioner, Assistant Commissioner leh Enforcement changtu Superintendent, Aizawl SP, Law & Judicial Deputy Secretary leh Under Secretary-te an tel. Excise & Narcotics Commissioner chu Secretary a ni.

Member dangte chu - Prof. Lianzela, Dr Lalchhuanawma Tochhawng, Dr K Lalbiakzuala, Dr C Lalhrekima, Dr Laldinliana Varte, Rev. R Lalengkima, JH Ramnghinglova, Dominic Lalhmangaiha, KL Liana, RK Thanga, Lalbiakzuala (CYMA), Vanlalrema Vantawl (MJA), Prof. C Lalkima, Rev. Dr K Lalrinthanga, Rev. R Lalrinsanga, Lalnunkunga Sailo leh Lt.Col. Lalramhluna te an ni.

Review and Evaluation Committee tih tura sorkarin a ruatte chu, zu zawrhin mipuite sum leh pai dinhmun leh vantlang nun a nghawng dan enfiah te, mihring hriselna a nghawng dan zir chiante leh, MLPC Act leh Rules hman dan enfiahte a ni a; report thehlut turin hun bituk siamsak an ni lo.

MLPC Act hi January 15, 2015-ah hman
ṭan a ni a, March 16, 2015-ah zu zawrh ṭan a ni.