Zira'n rualbanlo hnenah taxi a hlân

Home minister R Lalzirliana chuan nimin khan pianphunga rualbanlo Vanrammawii (22), Armed Veng hnenah lehkha a zir chhunzawm zel theihna tura a hman atan taxi a hlân.

Taxi hlanna inkhawm hi Lal Thanhawla Audi-torium-a neih a ni a; Home Minister chuan, Vanrammawii hnena taxi hlan a ni chu tumahin an thîk a rin loh thu sawiin, "Kum 2009 aṭangin sorkarin Aizawl khawpui atan taxi permit kan la pe miah lo. Vanrammawii hi tuma'n an thîk ka ring lo a, amah ang hian mahni kea kal thei loin awmin, taxi thar neih phah dawn mah ila tumahin an duh ka ring lo," a ti.

R Lalzirliana chuan taxi lei a nih dan sawiin, "Sorkar malsawmna dawnga contract hna hmutu Congress worker-te hnenah thawhlawm kan khawn a, keimahni chhungkaw sum chauh ni loin he taxi hi kan lei a ni," a ti a; an hun hman chu Chief Minister pawhin
ṭha a tih thu a sawi.

Vanrammawii pi, Lalrikhumi chuan, an tunu college kalna atan Pathianin mi a pek ṭhin thu sawiin, "Lehkha zir zel a duh ve tlat si avangin zah pawh sawi thei loin Home Minister hi kan pan tawp mai a, kan lawm tak meuh meuh a ni. Kan fanu tana taxi pek a ni hi mak kan ti zawk hial," a ti.

Vanrammawii hi thla kua a nih aṭanga rual-banlo, kal thei lo a ni a; Class VII-ah Mizoram pumah pakhatna niin, HSLC-ah first division-ah a pass a, tunah hian Pachhunga University College-ah fifth semester a zir mek a ni.