Employment Exchange-ah inziak lut an tlem
Aizawl district-a Employment Exchange-ah ṭhalai hna zawng inziak lut an tlem tial tial. Inziak lut an tlem tial tial chhan hi ṭhalaite'n Employment Exchange (EE)-a inziah luhin awmzia a nei tawk loa an hriat vang te, registration a huna an tihnun loh vangte leh MPSC-in EE kaltlang loa hna eng emaw zat a lak tawh vang nia an ngaih thu EE office-a thawkte chuan an sawi.
Vanglaini palaiin a kawmnaah EE office hotute chuan, tun hma chuan EE-ah ṭhalai hna zawng mi 20,000 aṭanga 30,000 vel an inziak lut deuh reng tih an sawi a, "Tunah chuan mi 18,000 vel an ni tlangpui tawh. Eng emaw bik thila hna lak dawnah erawh chuan inziak lut chawp an pung nasa thung," an ti.
EE hotute sawi danin, July 2016 thleng khan thiamna chi hrang hrang nei EE-a inziak lut mi 18,762 an awm a; thla tin uluk taka chhinchhiah zel ni mah se, inziak lut aiin a hmaa inziak lut tawh, an inziah luh hun chhung a tawp tawh vanga tih thar leh ngai zingah ti thar tawh lo an tam zawk zel a ni.
EE-a inziah luh a nihin, an inziah luh aṭangin kum thum zel rin theih a ni a, kum thum a ral chuan tih thar leh zel tur a ni. Dan ang chuan, sorkar department hrang hrangin hna ruak an neih chuan EE-ah an duh ang thiamna nei an dil ang a, EE office-in National Employment Service Manual angin an hnena inziak lutte aṭangin senior dan azirin mi 20 zel ṭum khatah hna ruak hnawhkhat thei tur department hnenah an pe ang.
EE office-ah hming a pek aṭang chuan sorkar department chuan an duh zawng an lo thlang tur a ni a; mahse, sorkar department lamin dan loa hna lâk an neih ṭhin avangin EE office-in insawifiah tura tih pawh an nei fo a ni. Insawifiah tura an tihin, sorkar department lamin EE-in dan a kalpuite chu an hriat loh vang a nih thu an hrilh ṭhin.
Employment Exchange office hi Aizawl, Lunglei, Siaha leh Cham-phaiah a awm a; EE-a inziah luh dawnah Aizawl district EE office-ah kher inziah luh a ngai lo a, an awmna district-ah a inziah theih a ni. Sorkar hna ruak a awm chuan National Employment Service Manual angin district-te'n an awmna district EE-ah an dil mai tur niin an sawi.
Ṭhalai hna zawng inziak lutte hi ni khatah an tam ber changin mi 150-200 vel an inziak lut a; chawhrualin, mi 40-50 vel an inziak lut ṭhin a ni.