KHAWTHLIR

Thisen pe

Salvation Army, Central South Division-a Youth Council ruahmannain Thingsulthliah CO bial, Baktawng CO bial leh Sesawng CO bialte
chuan nimin khan Thingsulthliah YP Hall-ah Aizawl Civil Hospital tan thisen unit 71 an pe a; a petute mipa 63 leh hmeichhia pariat an ni.

Free clinic

Lairam Christian Medical Centre, Lawngtlai chuan nimin khan an kum 15 tlin lawm nan a thlawna inentirna buatsaih a ni a, mi 300 chuang an inentir. LIKBK damdawi-in, Lairam Christian Medical Centre hi September 19, 2001-ah hawn ṭan a ni a; nimina a kum 15-na lawmna puala free clinic-ah hian Lawngtlai leh a chhehvela mite an inentir a ni.

NLUP sem

Commerce & Industries department chuan nimin khan District Industries Centre, Lungleiah NLUP ṭanpuina an sem a, parliamentary secretary (Industries) Joseph Lalhimpuia'n a hmanpui. Ṭanpuina hi mi 79 hnenah puanthui khawl chi thum - embroidery, overlock leh foot sewing machine leh Rs. 21,480
ṭheuha sem a ni.

Vaiphei lawmpui

ZNP chuan thuchhuah siamin, Mizo zinga High Court chief justice hmasa ber T Vaiphei, Tripura High Court chief justice atana ruat a ni chu an chhuan thu leh an lawmpui tak zet thu an tarlang a; "Hetiang dinhmun pawimawh chelh thei Zo hnahthlak zingah kan awm hi lawmawm kan ti a, T Vaiphei hi a hnathawh zelna turah
ṭha taka a thawh zel theih nan duhsakna sang ber kan hlan a ni," an ti.

Meth man

CID (Crime) hnuaia Special Narcotics staff-te chuan Pathianni zan dar 8:55 khan Lalnilawmsanga (36) s/o Laldawngliana (L), Darlawn Venghlun, tuna Ṭhuampuia cheng mek nia insawi hnen aṭangin Methamphetamine mûm 4,442 an man. Meth an man hi Lalnilawmsanga hralh tumna ang chuan cheng nuai hnih chuang hû a ni.