MNF party-in Martarte Ni an hmang Martarte hi nationalism venghimtu an ni: Zorama

MNF party chuan nimin khan Luangmuala Martar Thlanmualah Martar Day vawi 36-na an hmang a; MNF president Zoramthanga'n thu sawiin, "Martarte hi Mizo nationalism venghimtute an ni," a ti.

Martarte Ni hmanna inkhawm hi MNF vice president R Tlanghmingthanga'n a kaihruai a; MNF President leh hruaitu dangte'n martarte hriatrengna thlanah zahna entir nan pangpar an dah. Khaw dang 17-ah pawh Martar Day hman a ni a, MNF senior vice president Tawnluia'n Lungleiah, vice president Dr R Lalthangliana'n Siaha-ah leh treasurer Vanlalzawma'n Kolasib-ah an hmanpui a ni.

Zoramthanga chuan, rambuai laia martarte'n an beih chhan leh an thih chhan chu 'Pathian leh kan ram tan' tih a nih thu sawiin, "Mizo hnam thinlung tungding tur leh humhim tura beihna Mizo nationalism dotu lian ber chu Congress a ni. Hman
aṭang tawh khan thiam taka lem changin, puana inkhuh mawiin Zoramah an lo lut a, tunah chuan a lang a pauin Mizo nationalism an bitum ta chat a ni," a ti.

MNF President chuan, Mizo nationalism humhim tura independent an puana anmahni dotute chu jet fighter, armoured car leh sipai division tél an nih thu a sawi a; Congress party erawh chuan 'Independent an sual lo' tih te, India sipaite'n Aizawl leh Mizoram an bomb alh duai duai laiin 'Aizawl an bomb lo' titein an sawi lui tlat niin a sawi.

Congress party-in Mizo hnam thinlung nung chho mek tihnêp tum mah se, mipui leh ṭhalaite rilruah hnam thinlung a pár ṭan leh ta nia sawiin, Zorama chuan, "Hei hian kan ram chhe mek a tungding leh dawn a, chu tak chu vawiina kan martarte thih chhan a ni," a ti.

Zoramthanga chuan, Martar Thlanmual chu pawl bil ta a ni lo tih sawiin, "Mizo zawng zawng huapa ruahman a ni," a ti. March 1966 aṭanga Mizoramin zalenna a suala rammu thite chauh ni loin, British-in Mizoram a awp lai aṭanga Mizo hnam tana beia nunna chán te, Mizo pasalṭha leh rambuai nghawng, chhan hrang hrang vanga nunna chante a huam vek thu a sawi.

Martar Thlanmual zau zawng hi sq.metre 2,660 a ni a, August 20, 2008-ah khatih laia chief minister Zoramthanga'n a hawng. Hriatrengna thlante chu block hrang hrangah ṭhenin, block pakhatah mi 16 hming leh an khua, thih nite granite phêkah a mal te tea ziah a ni. Mi 2,400 vel hming ziah theihna tura siam a ni a, mi 1,563 hming an ziak tawh. Ruhro 120 dah theihna siam a nih bakah, a chungah monument ft. 42-a sang a ding bawk.