Pawl thar ZDF-in an thil tum an puang

Zoram Decentralisation Front (ZDF) hruaitute chuan nimin khan Aizawl Press Club-ah thuthar thehdarhtute kâwmin, an pawl thil tumte an puang a; kum 2018 inthlanah candidate an neih ve mai theih thu an sawi rualin, an chuh ngei dawn tih erawh an la sawi thei lo.

ZDF president Lawm-thanga chuan, an pawl din chhan ber chu Mizoramah tualchhung sorkar, district leh village level-a thuneitute hnena danin a sawi ang taka thuneihna pek a nih theih nana hmalak a nih thu a sawi a; Mizorama sorkar awm tawhte leh political party-te'n an duh lo a, an phal lo a, thuneihna an pe duh lo niin a sawi.

Lawmthanga chuan, mipuiin thuneihna sem zâi an duh nia sawiin, chumi avang chuan political party-te chuan inthlan leh hunah thuneihna sem zai chungchang chu an manifesto-ah telh an tum hlawm niin a sawi a, "Tunah duh thar thut anga an manifesto-ah an telh a nih pawhin, ministry siam thei khawpa MLA neih tam nan mipui bum an tumna a ni tih i hria ang u," a ti.

Zawhna chhangin, ZDF hruaitute chuan, ZDF chu political party a la ni lo tih an sawi a, "Kan ram rorelnaah lungawina kan hmu lo a, mipui an lungawi lo a. Mipui thleng phak rorelna a awm theih nan ṭan lak kan tum," an ti.

Zawhna dang chhangin ZDF Advisory Board-a hruaitu Rev. Robawia chuan, "Inthlan chuh a har lo, independent pawhin a chuh theih. Political party-te angin member kan zawng dawn lo a, electoral roll-a awm zawng zawng hi kan member-te an ni mai," a ti. Advisory Board-a vice chairman Rev. F Lalchungnunga pawhin, ZDF chu political party a la ni lo tih a sawi rualin, "Political party lo chuan inthlanah ZDF-in a chuh lo ang. Tunah chuan poli-tical party a ni lo," a ti bawk.

ZDF-ah hian vice presi-dent chu Lalbiakzama a ni a, general secretary chu VL Huapa a ni. ZDF Advisory Board-ah hian kohhran hrang hranga hruaitu, pastor pension tawhte an awm a, chairman chu Rev. Liandawla a ni.

ZDF hi April 2, 2011-a din a ni a, an pawl thil tum ber chu, 'Miretheite ngaihsak a, chawikan a, dinhmun ṭhaa siam' tih a ni.