Buhfai supply tur thlan chungchanga Sorkar khinna High Court-in a hnâwl

Open market-a Mizoram sorkar (Food, Civil Supplies & Consumer Affairs)-in buhfai supply tur a thlan dana mi pathumin Mizoram sorkar an khinna chu Gauhati High Court, Aizawl Bench-in a hnâwl a; hemi chungchangah hian nimin khan High Court-in order a tichhuak.

Tarlan tawh angin, Mizoram sorkarin buhfai supply tura MIZOFED a thlan dan chu tender chhangtu mi 10 vel intélkhawmin Gauhati High Court-ah an khing a; PIL thehluha hming tumtute chu - Philip Lalawmpuia, Tuikual; Laldawngliana, Keifang leh Lalrinchhuanga, Bilkhawthlir te an ni a, August 18, 2016-ah High Court-ah petition an thehlut.

High Court chuan Mizoram sorkar leh MIZOFED-te chu August 31, 2016 ral hmaa Court-a insawifiah turin a hriattir a; insawifiahna an thehluh hnuah hearing neih a ni. Court chuan petition hi September 16, 2016 khan a hnâwl a, nimin khan order a tichhuak nghal.

Gauhati High Court order chuan, FCSCA department-in open market-a buhfai supply tura MIZOFED a thlan danah thil dik lo a hmuh loh thu a tarlang.

Supply depart-ment-in MIZOFED hnena buhfai supply order a pekah chuan, September 2016 ral hmaa buhfai qtl. 1,03,000 Mizoram sorkara pe tur leh, September thla hnuah chuan thla tin qtl. 65,000 pe tura tih a ni.