KHAWTHLIR

Pisa kai hun

Mizoram sorkar chuan October 17, 2016 aṭanga February 2017 chhunga pisa kâi hun tur a puang. Thlasika pisa kai hun tur chu Mizoram chhunga sorkar pisa leh hmarchhaka Mizoram House tan zing dar 9 aṭanga tlai dar 4 thleng a ni ang a; New Delhi, Kolkata, Mumbai leh Bengaluru-a Mizoram House-te tan chuan zing dar 9:30 aṭanga tlai dar 4:30 a ni ang.

Dawr theih loh

Vawiin hian Aizawl khawpui chhunga gas distributor, computer operator leh delivery boy-te'n training an neih dawn avangin Aizawla gas distributor zawng zawng dawr theih an ni dawn lo.

Meizu man

Lawngtlai District Anti-Tobacco Squad chuan nimin khan Lawngtlai College leh Chawnhu-a sorkar office-ah squad drive an nei a; phal lohna hmuna mei zu mi pasarih an man a, pawisa an chawitir nghal.

Mi 1,405 admit

August 2016 chhung khan Aizawl Civil Hospital-ah mi 41,136 an inentir a, mi 1,405 admit an ni. Nau piang 387 leh mithi 71 an awm a; Mizoram páwnah mi 210 refer an ni.

Lo neitute tanpui

Champhai district-a Horticulture department chuan nimin khan Champhai Tuipuia tomato chíngtute hnenah tomato dahna tur báwm leh hmanruate an pe a; tomato chíng tura thil pawimawh hrang hrangte an zirtir nghal.

RGPSA training

SIRD, Kolasib chuan Rajiv Gandhi Panchayat Sashaktikaran Abhiyan (RGPSA) hnuaia thawk tur an lak thar mi 19-te pualin nimin khan an conference hall-ah training an buatsaih a, Kolasib DC H Lalengmawia'n a hmanpui. Training hian ni kaw chhung a awh ang.

Hringlangtlang

Champhai District Park Committee chu nimin khan Champhai DC Vanlalngaihsaka hoin DC conference hall-ah an ṭhukhawm a; Hringlangtlang tihchangtlun dan tur leh hmalak dan tura hmachhawp hrang hrangte an sawiho.