Staff nurse lak tur MPSC rawtna hnawl turin MZP-in sorkarah ngenna a thlen

MZP chuan thuchhuah siamin, Mizoram Public Service Commission (MPSC)-in Health department-a staff nurse tur mi 25 a lak (recommend) danah dik lo a awm ngeia an hriat avangin, MPSC rawtna pawm lo turin Mizoram sorkar an ngen. Hetih lai hian, Health minister Lal Thanzara chuan, MPSC rawtna chu sorkarin a pawm dawn leh dawn loh a la sawi theih loh thu a sawi.

MZP tarlan danin, nimin khan MZP Pisapuiah Mizoram sorkara contract-a thawk mek nurse ṭhenkhat an lêng a, MZP hruaitute nen MPSC-in tun hnaia staff nurse lakna a kalpui dan an sawiho a ni.

MZP chuan, "MPSC-in Mizoram sorkara recommendation a thehluh tawh chu Mizoram sorkarin tihlawhtling lo a, a thara Mizoram sorkara thawk tawhte an senior dan indawta hnawhkhat turin kan duh. MPSC-in sorkara recommendation a siam hi Mizoram sorkarin pawm lo a, he hna lak tur hi siamṭhaa a bul aṭanga interview ko leh turin Mizoram sorkar kan ngen a ni," an ti.

MZP tarlan danin, staff nurse post 25 hnawhkhat tur laknaah hian document felfai loh vanga hnâwl (reject) tawh mi paruk chu interview tura koh leh an ni a, chungte chu September 2, 2016-ah interview-tir an ni. Hnâwl tawh mi paruk an koh leh zinga pali chu an tling zui a ni.

MPSC-in staff nurse tura a thlan mi 25-te sorkarin a pawm dawn leh dawn loh chungchangah hian Health Minister chuan, MPSC recommendation-in a hnen a la thlen loh avangin sawi theih a la neih loh thu
Vanglaini palai a hrilh.

Hetih lai hian, MPSC chairman PC Lawm-kunga chuan September 15 khan media-te zawhna chhangin, MPSC-in staff nurse tur a lak danah dik lo a awm lo niin a sawi. MZP-te'n thil hre chiang loin thu an chhuah nia sawiin, a monu leh a monu ṭhiannu an duhsak bik loh thu leh a monu interview ni-ah interview board-ah a ṭhu ve lo niin a sawi a ni.

PC Lawmkunga chuan, contract-a thawk tawhte duhsak bik tur anga ngaihna chu tlangkam aṭangin an hria a, mahse, Health Minister-in seniority-a lak a nih tur thu a sawi nia sawi chu an hriat ve loh thu a sawi a; sorkar aṭangin seniority-a lak tur tih thu an dawn loh thu leh seniority-a lak tur ni se chuan interview buatsaih pawh a ngaih a rin loh thu a sawi bawk.