Hindi zirtirtute hlawh lak har chhan sawifiah
School Education department chuan thuchhuah siamin, Centrally Sponsored Scheme (CSS) hnuaia Hindi zirtirtute'n hlawh an lak theih loh chhan an sawifiah.
School Edcucation department tarlan danin, Mizoramah CSS hnuaiah Hindi teacher 1,305 Mizoramah rawih mek an ni a, an hlawh zawng zawng chu sor-kar laipui tum a ni. Scheme hi 11th. Plan chhung atan chauh ni mah se, India hmarchhak state tan chuan 12th. Plan tawp hun, 2016-17 thleng tur a ni.
Hindi teacher-te hlawh atana sum dilna sorkar laipuiah thehluh rualin, a hmaa sum hmuh tawh hmanna audit certificate leh utilization certificate thil tel zel a ngai a, certificate thil tela kum 2015-16 chhunga thla 10 (sawm) chauh hlawh pek, a bak la pek leh tur atan leh kum 2016-17 a thla 12 atan hlawh tur sum dilna chu June 28, 2016-ah Ministry of Human Resourse Development (MHRD)-ah thawn a ni.
MHRD-in August 19, 2016-ah kum 2015-16 hlawh pek tur atan chauh sanction order a tichhhuak a, sanction order chhuah rual hian Mizorama Hindi zirtirtute'n hlawh an hmu nghal thei lo.
Principal Accounts Officer, MHRD-in sanction letter a lo hmuh hunah Reserve Bank of India (Central Accounts Section, Nagpur) hnenah Mizoram sorkar account-ah pawisa chu hman theih tura dah lut turin lehkhain a hriattir ang.
RBI hian Principal Accounts Officer, MHRD lehkha a hmuh hunah, Mizoram sorkar account-ah sum a dah lut ang a; Principal Accounts Office-in RBI hnena sum dah (credit) tura a hriattirna copy chu Mizorama Accountant General leh Finance department a pe tel tur a ni.
MHRD-in August 19-ah sanction order tichhuak mah se, he thu ziah lai thleng hian RBI-in Mizoram sorkar account-ah sum a la dah lut lo. RBI-in Mizoram sorkar account-a pawisa a dah hnuah pawh Finance department kaltlangin pawisa chu hmuh tur a ni. Sorkarin Hindi zirtirtute dinhmun chu a manganthlak a ni tih a hriat avangin, RBI-in a takin pawisa la dah lo mah se, hlawh an lak theihna turin a báin September 9, 2016 khan Finance department chuan sum pek chhuahna lehkha a tichhuak a ni.