Mumbai-a NAFSCOB Meeting-ah tel

India rama cooperative bank-te inthlun-khawmna, National Federation of State Cooperative Bank (NAFSCOB) chuan September 19, 2016 khan an hmunpui, Mumbai-ah General Body Meeting leh Board of Directors Meeting an nei a; Mizoram aṭangin Mizoram Cooperative Apex Bank chairman T Lal-muanpuii leh
Board member Hani Syhly-te an tel.

NAFSCOB meeting-ah hian India rama cooperative bank hrang hrangte hmasawnna tura ṭan lak dan turte leh cooperative bank-te thawhhona kalpui zel dan turte an rel a; vice chairman leh board of directors an thlang bawk.

MCAB chairman T Lalmuanpuii leh Board member Hani Syhly te chuan nimin khan Reserve Bank of India office leh NABARD office an tlawh a; RBI governor thar Urjit Patel leh executive director Dr Deepali Pant Joshi te an kawm.

Inkawmnaah hian MCAB hotute chuan, hmarchhak bialah Guwahati-ah chauh issue department a awm avang-in Mizorama bank-te'n harsatna an tawh thu an sawi a; harsatna sutkian nan awlsam zawka bank-te'n Guwahati pan kher loa sum an lak theihna tur issue department Mizorama dah turin an ngen.

RBI Governor chuan, Mizoram chu India rama state ralmuang ber a nih avangin MCAB hotute ngenna chu an lo ngaihtuah tur thu a sawi.