MLA-te'n ART damdawi lakna atan Rs 50,000 ṭheuh thawh an remti

Mizoram Legislative Forum on AIDS chu nimin khan IPR Lianchhiari Rûn conference hall-ah an ṭhu a, Health & Family Welfare minister Lalrinpuii'n a kaihruai. MLA-te chuan HIV veite'n chatlak loa damdawi an lak theih nan kum 2024-25 chhungin MLA fund aṭangin Rs 50,000 ṭheuh thawh an remti.

Minister Lalrinpuii chuan, HIV/AIDS chungchanga Mizoram dinhmun chu mipui náwlpuiin an vei a ṭul thu sawiin, "Legislator-te pawhin tun aia nasaa hma kan lak a pawimawh tawh tak meuh," a ti a; HIV hluar dan (prevalence rate)-ah India ram chu 0.2% a nih laiin, Mizoram bik chu 2.73% a ni a, India rama HIV hluar berna state a nih thu a sawi.

Ṭhutkhawmah hian MLA-te leh MSACS hotute'n HIV/AIDS donnaa ṭan lak dan tur an sawiho a; MLA-te chuan, HIV/AIDS donaah thâ thawh an inhuam thu an sawi. HIV veite'n chatlak loa anti retroviral therapy (ART) an lak theih nan financial year 2024-25 chhungin MLA fund aṭangin Rs 50,000 ṭheuh thawh an remti a ni.

MSACS project director Dr Jane R Ralte chuan, January 2025 thlengin Mizoramah HIV vei mi 32,287 hmuh chhuah a nih tawh thu a sawi a, "He natna avanga thi hi hriat theih chinah mi 5,511 an tling tawh," a ti.

Dr Jane R Ralte tarlan danin, April 2024 aṭanga January 2025 inkarah Mizoramah HIV vei mi 1,769 hmuh chhuah a ni a, hmuh chhuah zinga 67% chu mipat hmeichhiatna hman aṭanga kai niin, 30.44% chu hriau thlianghlim lo inhman ṭawm aṭanga kai an ni.

Ṭhutkhawmah hian, mahni inringhlelte tan thisen endiktir thuai a pawimawh thu te, HIV veite hrisel ṭha pangngai taka an awm zel theih nan ART damdawi ei ṭhat a ṭul thu te, HIV darh zel tur vennaa pawimawh drop-in-centre mumal taka hman ṭangkai leh theih dan turte sawiho a ni.