Larsapin Financial Literacy Week hawng

Reserve Bank of India (RBI) chuan nimin khan Mizoram Rural Bank (MRB) Head Office, Aizawlah Financial Literacy Week 2025 an buatsaih a, Governor Gen. Vijay Kumar Singh-a'n a hawng.

Kumina Financial Literacy Week thupui chu 'Financial Literacy - Women's Prosperity' tih a ni a; Governor chuan sum leh pai enkawl chungchang inzirtirna lehkhabu (Financial Literacy Booklet), Mizorama library hrang hrang 513-a dah tur a tlangzarh.

Gen. VK Singh chuan, kumina Financial Literacy thupui atana in chhungkhura pawimawh hmeichhiate zirtirna lam hawi thlan a ni chu ṭha a tih thu a sawi a, "Hmalakna tur thupui thlante hian chhungkaw dinhmun inchen lo tak taka khawsa hmeichhiate chakna leh thiamna a pek ngei ka beisei," a ti.

Governor chuan, mipuite'n bank an dawr vek theih dan tur te, mipui tana scheme awmte leh credit guarantee system-te mipuiin an hman ṭangkai vek theih nan ngaihtuahna sénga hma la turin Mizorama bank leh financial institution-te a chah.

Aizawla RBI general manager T Lhungdim chuan, RBI-in kum 2016 aṭangin kum tin Financial Literacy Week a hman ṭhin thu sawiin, "A tum ber chu campaign chhunga thupui siamte mipui hnena a tam thei ang ber zirtir a ni," a ti a; tun kar chhungin sum leh pai inzirtirna mass media campaign an kalpui dawn thu a sawi.

Financial Literacy Week hawnnaah hian State Bank of India, Mizoram Rural Bank, Mizoram Cooperative Apex Bank leh NABARD aiawhte pawhin thu an sawi bawk.

RBI general manager T Lhungdim chuan nimin vek khan Financial Literacy van a vailiam a; van hmang hian Week chhungin Aizawl, Serchhip, Lunglei, Saitual leh Hnahthial-ahte Financial Literacy Week campaign neih a ni ang.