MSU-in document lem an bawhzui

Mizo Students’ Union (MSU) Gen. Hqrs hruaitute chuan nimin khan Home minister K Sapdanga chu a pisaah an hmu a; document lem siamtute man chhuah an nih theih nan chak zawka hma la turin an ngen.

MSU hruaitute chuan, tun hnaiah social media-ah birth certificate leh marksheet siam thei nia insawi an awm ṭhin thu Home Minister an hrilh a; document lem hmangin pawi lian tak khawih theih a nih avangin document lem siam ṭhinte chhui chhuah kawngah chak zawka hma lakpui turin an ngen a ni.

Social media-a birth certificate leh marksheet lem siam thei nia insawi leh inzuarte chhui chhuah an nih theih nan MSU hruaitute hian nimin vêk khan Aizawl Police Station-ah first information report (FIR) an thehlut bawk.