100 Days TB Elimination Campaign-ah TB vei mi 33 hmuh chhuah a ni tawh

National TB Elimination Progremme chuan nimin khan Directorate of Health Services conference hall-ah thuthar thehdarhtute pualin ni 100 chhung TB campaign kalpui mek chung­chang hrilhfiahna leh inkawmhona an buatsaih. Mizorama campaign kalpuina district pali-ah nimin thlengin ngawr (TB) vei 33 hmuh chhuah a nih tawh thu an tarlang.

State TB officer Dr Febiola Kharkongor chuan, 100 Day Intensified Campaign on TB Elimination-in a tum chu ni 100 chhunga a tam thei ang ber TB vei hmuh chhuah a nih thu a sawi a, "Campaign chhunga TB vei kan zawn chhuaha kan enkawl vat loh chuan natna an theh darh zel a, Mizoramah TB vei, la inen­kawl lo leh la inhre lo an tam hle a ni," a ti.

Kum 2024 chhung khan TB vei mi 2,311 hmuh chhuah a nih thu leh, la hmuh chhuah loh an la tam dawn thu sawiin Dr Febiola Kharkongor chuan, "Ni 100 chhung campaign-ah hian a tam thei ang ber TB vei hmuh chhuaha enkawlna pek kan tum a, a thlawnin Mizorama hmun 35-ah TB vei leh vei loh inendik theih reng a ni," a ti a; theihtawp chhuaha campaign chungchang puanzarsak turin thuthar thehdarhtute a sáwm.

State TB Cell medical officer Dr Vanzarliana tarlan danin, campaign kalpui ṭan ni, December 7, 2024 aṭanga February 23, 2025 thleng khan Mizorama campaign kalpuina district pali-ah microscopy, x-ray leh NAAT hmangin mi 10,477 enfiah an ni a, TB vei mi 33 hmuh chhuah a ni tawh.

Ni 100 chhung TB campaign hi sorkar laipui chuan December 7, 2024 aṭanga March 17, 2025 thleng kalpui turin a ruahman a, campaign neihna atan India rama district 347 a thlang. District 347 thlan zingah Mizorama district pali - Aizawl, Champhai, Serchhip leh Mamit district-te a tel a ni.

State TB Cell hotute chuan, chawlhkar hnih aia rei khuh/khawsik, khâk thi, rihna tlahniam, chuap lam fel lo, áwm chhung ná, zan lama thlan fim chhuak, thawhah leh chaw ei tui lote chu TB vei leh vei loh test vat turin an chah.

TB vei leh vei loh enfiah theihna hmun Mizoramah 35 a awm a, a thlawnin khâk endik theih a ni. TB damdawi pawh a thlawnin pek a ni a, sorkar damdawi-in hrang hrangah a thlawnin endik theih a ni bawk.