KHAWTHLIR

Thisen pe

February 22, 2025 khan KṬP, Ṭhuampui Bial chuan Synod Hospital tan thisen unit 49 an pe a, petute mipa 38 leh hmeichhia 11 an ni. Independent Church of India KṬP Aizawl Presbytery chuan Inrinni khan Civil Hospital, Aizawl tan thisen unit 46 an pe a, petute mipa 33 leh hmeichhia 13 an ni a; KṬP, Ramhlun Vengchung Branch pawhin unit 36 pein, petute mipa 26 leh hmeichhia 10 an ni. Civil Hospital-ah hian individual voluntary donor mi 10 an awm bawk.

Kût hman nan pe

Mizoram Cooperative Apex Bank chuan kumina Aizawla Chapchar Kût lawmnaa a ṭula hman atan nimin khan Art & Culture Director hnenah Rs 3,00,000 an hlan.

ABHA inzirtir

Ayushman Bharat Digital Mission leh Mizoram University-a Computer Engineering department chuan nimin khan MZU-ah Ayushman Bharat Health Account (ABHA) chungchang zirhona an buatsaih. ABHA portal-a mahnia inziah luh dan te, Nextgen ehospital HMIS leh ABHA mobile application hman dante inzirtir a ni a; Mizoramah mi 6,50,000 velin ABHA registration an nei tawh tih tarlan a ni.

Kawlkulh YMA-in ngaihdam an dil

Kawlkulh Joint YMA chuan an member Lawmsangzuala s/o Vankhawpuihluna, Kawlkulh-in Nagaroor, Kerala-a B.Tech a zirpui Valentine VL Chhana Hrahsel, Pangzawl, February 22, Inrinni zana a vih hlum chungchangah ngaihdam dilna an tichhuak. Kawlkulh Joint YMA chuan, thil thleng chu pawi an tih thu leh an dem thu tarlangin, "Valentine VL Chhana'n a kalsan a chhungte leh Pangzawl mipui kan tawrhpui tak zet... He thihna avanga rilru ná zawng zawng chungah ngaihdam kan dil tak zet a ni," an ti.

Kuhva phurh khap

Aizawl district magistrate Lalhriatpuia chuan thupek chhuahin, Aizawl district-ah dan loa kuhva phurh khap a nih thu a puang. Bawrhsap chuan, "Aizawl district chhung khawi hmunah pawh danin a phal bak chin kuhva leh bungrua rêng rêng lak luh leh phurh khap tlat a ni," a ti.