Mizoram dinhmun hriatthiamna bik nei turin Larsapin 16th FC a ngen

February 26, 2025 thleng Mizorama cham tura rawn zin 16th Finance Commission hotute chuan February 23, Pathianni zan khan Raj Bhavan-ah Governor Gen. Vijay Kumar Singh an kâwm. Larsap chuan, sorkar laipuia rawtna an thlen hunah Mizoram bik chu hriatthiamna thui tak nei turin a lo chah.

Governor chuan, Mizoram dinhmun zir tura rawn tlawhtu 16th FC chairman Dr Arvind Panagariya leh hotu dangte chu thinlung taka a lo lawm thu sawiin, Mizoram tana pawimawh leh ṭulte a sawipui a; Mizoramin chhiah (revenue) a lak luh tam loh avangin sorkar laipuia rawtna an thlen hunah hriatthiamna thui tak nei turin a lo chah a ni.

Mizoram chu tlang ram a nih avangin hmun dangte aia hmasawnna ruhrel siam a harsat dante sawiin Larsap chuan, "Mizoram kaltlanga ruihhlo tawlh a hluar avangin ruihhlo donaah hmalak nasat a ṭul a, dan leh thupek kenkawh kawnga mamawhte thawm ṭhat a ṭul hle," a ti.

Gen. VK Singh chuan, ṭhenawm ram a buai avangin raltlanin Mizoram an pan nasat thu leh raltlan buaipuinaa harsatna awmte a sawi a; Lengpui Airport tihchangtlung a ṭul thu te, ṭhalaite tan hna tam zawk siam a nih theih nan hmalak a ṭul thute a sawi bawk.

16th Finance Commission hi India rama chhiah lak luh aṭanga kum 2026-27 - 2031-32 chhunga state hrang hranga sum insem dan tur ruahmanna siama sorkar laipuia rawtna thlentu tur a ni a; Constitution Article 280 hnuaiah December 31, 2023 khan din niin, Chairman bakah full time member pali an awm a ni.