16th FC hotute'n pawl aiawhte an kâwm

16th Finance Commission hotute chuan nimin khan Aijal Club-ah political party hrang hrang aiawh te, tlawmngai pawl aiawh te, autonomous district council leh tualchhung sorkar hotute leh Mizoram Chamber of Commerce and Industries hotute an kâwm.

Ṭhutkhawmah hian Mizorama autonomous district council pathum - CADC, MADC leh LADC hotute'n an huam chhung ṭheuha sum leh paia an dinhmun leh an harsatnate an thlen.

Political party aṭangin Zoram People’s Movement, Mizo National Front, Mizoram Pradesh Congress Committee Bharatya Janata Party leh Aam Aadmi Party aiawhte an tel a; ṭawngka leh ziakin Mizoram mamawhte an thlen a ni.

Aizawl Municipal Corporation, Lunglei Municipal Council, Aizawl City Local Council Association leh All Mizoram VC Association-te pawhin an dinhmun ṭheuhte an hrilh a; tlawmngai pawl aṭangin Central YMA leh MHIP Gen. Hqrs hruaitute'n hun an hmang bawk.

16th Finance Commission hotute pualin nizan khan Aijal Club-ah cultural show leh zanriah buatsaih a ni a; vawiin hian Zoram Medical College & Hospital leh Falkawna hmun dangte an tlawh ang.