Kuhva, heroin leh gelatin man

Assam Rifles sipaite chuan tun hnai khan Mizoramah ruihhlo leh dan loa thil tawlhruk chi hrang hrang an man.

AR sipaite hian nimin khan Champhai district-a Zote leh Bulfek inkar ramhnuaiah dan loa tawlhrûk kuhva rah ip 41 an man a, February 22, 2025 khan Hmunhmelṭha huam chhung ramhnuaia thuhruk kuhva rah ip 8 an man bawk. Kuhva rahte hi Customs hnenah an hlan a ni.

February 22 vek khan AR sipaite leh Excise & Narcotics mite chuan Lungleiah heroin (no. 4) gram 57.69 an man a; ruihhlo leh a neitua puh K Lalrinchhana (28), Lunglei Salem Veng leh Vanlalruati (23), Lunglei Ramthar Vengte chu Excise & Narcotics department-in an hreng zui nghal.

Assam Rifles-te chuan February 21 pawh khan Sakawrtuichhun, Aizawlah mi pathum hnen aṭangin gelatin tlâwn 4,980 (kg. 622.5) an man bawk a, Mizoram Police hnenah an hlan a ni.