ZPM-in Krismas chibai mipui an bûk

ZPM vice president K Sapdanga chuan, Mizoram chhung leh páwna Zofa zawng zawngte chu ZPM hmingin Krismas chibai a bûk a, hlim taka hmang turin duhsakna a hlàn.

 

ZPM president Lalliansawta a damloh avanga president mawhphurhna la mektu K Sapdanga chuan Krismas pualin nimin khan thuchah a tichhuak a; "Kum 2020 Krismas chu kum dang angin a huhoa hman rem lo mah se, chhungkaw tinte'n hlim tak leh hlâwk taka hmang turin duhsakna sang ber ka hlan e," a ti.

 

K Sapdanga chuan, hripuiin Mizote pawh a luhchilh thûk hle a, thihna te, natna te, kawng hrang hranga harsatnate a thleng tih sawiin, "Kan eizawnna a tibuai a, a bikin thlawhhma neia eizawng te, kut hnathawktute leh ni tin eichawp dapa khawsate phei chuan kan harsat phah hle. Kan sakhaw serh leh sâng tihphung thlengin min tibuai a ni," a ti a; hripui vanga chhiatna leh harsatna tuar zawng zawng ZPM-in an tawrhpui thu a sawi.

 

Ram pumin harsatna nasa tak a tawrh laia Kristian nihna leh Mizo hnam danglam bikna a lang chu lawmawm an tih thu sawiin Sapdanga chuan, "A ṭul dan ang zelin ṭanpuina bán phar chhuak chhunzawm zel turin mi tin kan ngen nghal a ni. Pathianin hun ṭha leh rálmuang zawk min la pe ngei ang tih beisei chungin ṭhahnemngai takin i ṭawngṭai zel ang u," a ti.

 

ZPM Vice President chuan, ZPM chu an din chhan ang ngeiin Mizoramah rorelna ṭha tun din a nih theih nan phûr takin hma an la mek tih a sawi a, "Zofa ṭhalaite zingah sorkar kalphung thar duhna leh nghahhlelhna pawh a lian sâwt hle," tiin, Mizo zawng zawngte chu ṭawngtaina nena ZPM ṭawiawm zel turin a ngen a ni.