Kolasib dist.-a CSS hnuaia Hnathawh dan sawiho a ni

Kolasib district-a thing-tlang hmasawnna tura Centrally Sponsored Scheme (CSS) hnuaia hmalakna hrang hrang endiktu, National Level Monitoring (NLM) team-te chuan nimin khan an thil hmuh dan sawihona hun Kolasib DC conference hall-ah an buatsaih a, DC H Lalengmawia'n a hmanpui.

NLM hian CSS hrang grang - MGNREGA, IAY, IWMP, Swachh Bharat Gramin, NRDWP leh NSAP hnuaia hmalaknate enfiahin Kolasib district chhunga khaw sawm an tlawh a ni.

NLM hotu Dr Amit Rahul chuan, hnathawh ṭha tak tak hmuh tur awm karah hnathawh dan mumal taka ziaka dah ṭhat a awm ṭha tawk lo chu pawi a tih thu a sawi a, "Scheme hrang hrang hnuaia hmalakna a ṭha tawk nge tawk lo teh tura social audit mumal neih a ni ṭhin lo hi a pawi. Hemi kawngah hian village council hruaitute leh department-te'n thawhhona ṭha zawk nena inzirtirna leh inhrilhhriatna hun hmang ṭhin se a duhawm hle," a ti.

Khaw hnufual bikte chawikanna atan scheme hrang hrangte chu hman ṭangkai lehzual a nih a beisei thu sawiin, Dr Amit Rahul chuan, a tlangpuiin hmalaknate ṭha an tih thu a sawi bawk.

Meeting-ah hian CSS hrang hrang khawihtu department aiawhte an tel a, an hnathawh dante an sawiho a ni.