Zirtirtu awm loh vangin Chawngte HSS zirlaite châwl

MSU Sub-Head-quaters, Chawngte chuan Chawngte Higher Secondary School-a history lecturer dah thar F Lalromawia chu kum khat chhunga Chawngte HSS-ah a awm loh avangin a transfer order an hâl tawh a; nimin aṭang khan tiam chin awm loin an châwl bawk.

Thu dawn danin, Chawngte HSS-a his-tory subject zirtirtu Laldammawia chu September 14, 2015-ah sawn chhuah a ni a, September 14, 2015-ah vek F Lalromawia, JL HSS-a history lecturer chu Chawngte HSS-a awm tura tih a ni.

Chawngte MSU-te chuan, F Lalromawia hi September 14, 2015-a transfer a nih hnuah Chawngte-ah vawi khatmah a awm lo niin an tarlang a; Chawngtea a hna a zawm loh vang leh sorkara an ngenna sorkarin a chhàn loh avangin transfer a nih aṭanga a kum khatna chiah, September 14, 2016 khan transfer order an hâl tih an sawi.

Transfer order an hâlnaa resolution an pass angin, Mizoram sorkar chu chawlhkar khat chhung an ngaichâng a, sorkar aṭangin thu lawmawm an hmuh loh avangin nimin khan Chawngte HSS-a zirlaite chu history lecturer awm loa class kal an duh lo a, tiam chin awm loin class an kal dawn lo a ni.