Thisen pek a tam theih dan tur sawiho

Nimin khan IPR directorate auditorium-ah Red Ribbon Club leh National Service Scheme (NSS)-a nodal officer-te pualin training buatsaih a ni a, khaihlak awm loa NSS leh Red Ribbon Club-te'n thisen an pek tam theih dan tur sawiho a ni.

Training hi Higher & Technical Education director R Lalrosanga'n a hawng a; sorkar laipuia Ministry of Human Resource Development leh NACO ten HIV leh a kaihhnawih lam venna kawnga thawh dunna tur inremna an lo ziah tawh angin, Mizoramah pawh MSACS leh HTE department-in memorandum of understanding (MOU) an ziah thu a sawi a, "HIV leh voluntary blood donation lama thawhhona tichak lehzual turin Joint Working Committee din a ni tawh," a ti.

MSACS project director Dr Lalmalsawmi Sailo chuan, damlo mamawhtute tana thisen tura mi dangte fuih turin nunphung hrisela nun pawimawhna thu sawiin, "HIV leh thisen pek hi a inkungkaih tlat a ni," a ti a; tun hnaia voluntary blood donation-a Mizoram a tlakhniam chhan chu donation camp buatsaihna leh chu lama hmalakna sum kaihlak vang niaa a hriat thu a sawi.

MSACS deputy director (Blood Safety Division) Dr Lalsangzuala Ralte chuan, mahni duh thu ngeia thisen pek chu a thianghlim bera ngaih a nih thu a sawi a, "Chhungte leh laina hnaite tana pek, blood bank-a awmsa rulhna atana pek zingah thianghlim tâwk lo hmuhchhuah a awm ṭhin avangin, voluntary donation hi uar tura kan infuih thar zel a pawimawh," a ti.

Dr Lalsangzuala Ralte chuan, National Blood Transfusion Council-in kum 2006-ah thisen sawngbawlna man (processing fee) la turin state tin a hriattir tawh tih sawiin, "Heng hun lai hian NACO-in thisen sawngbawlna leh hmanrua zawng zawng min la tumsak avangin NBTC hriattirna hi State Blood Transfusion Council-a sawiho a nihin, 'Processing fee la loin a la kal theih e' tih a ni ṭhin," a ti. NBTC-in a vawi thumna atan kum 2014-ah processing fee la tura hriattirna a rawn pek leh avangin processing fee chu lak a ni ta tih a sawi.

Training-ah hian voluntary blood donation-a Mizoram dinhmun thlirho a ni a; kum 2011 aṭanga 2014 inkara a thlawna thisen pek chu 91% aṭanga 93% a nih laiin, kum 2015-16 ah 75.82%-ah a tlahniam thu leh, kum 2015-16 chhungin donation camp 384 buatsaihah thisen unit 15,826 dawn a nih thu an tarlang.