World Alzheimer's Day hman a ni

Nimin, September 21 kha World Alzheimer's Day a ni a, Mizoramah pawh Alzheimer and Related Disorders Society of India (ARDSI), Mizoram Chapter huaihawta hman niin, nimin zing khan Millennium Centre tual aṭanga Vanapa Hall kawt thleng Memory Walk neih a ni.

Alzheimer natna leh a anpui natna dang vei leh an chhungte hriatpuina leh ṭawiawmna entirna leh, khawtlang hriatthiamna an mamawhzia lantirna tura kawngzawh (Memory Walk)-ah hian Health minister Lal Thanzara khuallian a ni a; Lal Thanzara chuan, Alzheimer's natna leh a anpui natna tuarte a tuarpui thu sawiin, thlahthlam lova ṭawiawm zel turin mipuite a chah.

Kawngzawhah hian Alzheimer natna veite bakah, kum 80 chung lamte pawh an tel a; Mizoram sorkara officer-te, tlawmngai pawl hrang hrang hruaitute leh zirna ina zirtirtu leh zirlaite telin, mi 500 velin kawng an zawh a ni.

ARDSI Mizoram Chapter hian Alzheimer natna hriat chianna tura seminar te, natna veitu chhungkuate puala workshop-te an buatsaih ṭhin a; a tuartu chhungkuate inpawh leh inṭanpui tawnna tur remchangte a siamsak bawk ṭhin.