KHAWTHLIR

Thisen pe

J Thankima College chuan nimin khan an college-a blood donation camp an huaihawt a, Aizawl Civil Hospital tan mipa 99 leh hmeichhia 13-te'n thisen unit 112 an pe.

Computer pe

Chief minister Lal Thanhawla chuan PAMRA office-a hman atan computer leh printer a pe. CM-in computer a pek hi nimin khan security officer to CM Ratan Kumar-a'n CM aiawhin PAMRA office-ah a hlan.

Truck chesual

September 20, 2016 zan dar 10:30 vel khan FCI kudama dah tur buhfai quintal 300 phur truck MZ-02 A-3926 chu Ropaiabawk, Chawlhhmunah chesualin, kawng thlangah a tla a, Lalnunzirsanga te in, Assam type a hnâwl. Thu dawn danin, truck hi Lalhmangaihzuala khalh a ni a, in a hnawlah hian Lalnunzirsanga te chhungkuaa mi pali an hliam a, mahse, an na lutuk lo.

Lawmpuina hlân

Mizoram University-in kumina master degree result a tihchhuaha Botany-a gold medalist F Lalsangpuii d/o F Challawma (L), Lunglei College Veng chu nimin khan bialtu MLA Chalrosanga Ralte-in chawimawina thuziak leh lawmpuina Rs. 5,000 a hlân.

Deptt. pek belh

Mizoram sorkara secretary, Benjamina, IDAS chu tuna a enkawl mek department pahnih - Excise & Narcotics leh Labour, Employment and Industrial Training bakah, department dang, Higher & Technical Education enkawl tel tura tih a ni.

Lehkhabu thar

C Lalthanmawia, Mualkawi lehkhabu buatsaih, ‘Mizo pipute thlarau kalkawng part II’ chu nimin khan Champhai DC Vanlalngaihsaka'n DC conference hall-ah a tlangzarh.

Lawmpuina thawn

Law & Judicial minister Lalsawta chuan, Tripura High Court chief justice atana dah thar justice T Vaiphei hnenah Sept. 20, 2016 khan lehkha a thawn a; mawhphurhna sang zawk pek a nih vanga a lawmpui thu a thawn.