Siaha leh Lawngtlaiah Housing for All sawiho

Siaha District Screening Committee on Housing for All chu nimin khan DC Harleen Kaur pisa-ah an ṭhukhawm.

Meeting-ah hian, Beneficiary Led Construction (BLC) hnuaia diltu mi 1,978-te dilna leh Credit Linked Subsidy Scheme(CLSS) hnuaia diltu mi 162-te dilna enfiah a ni. BLC leh CLSS-te hi kum 2022 thleng kalpui tur a ni a; CLSS hnuaiah hian a vawi khatna (2016-17) atan mi 70 hnenah subsidy pek tur niin, kum nga (2016-22) chhunga pek zat tur hriat a la ni lo.

BLC hnuaiah chuan kum 2016-22-in mi 1,590 hnenah ṭanpuina pek tur a ni a, kum 2016-17 atan mi engzat nge ṭanpuina pek tur tih erawh a la hriat theih ve loh.

Meeting-ah hian Siaha district-a MLA pahnih Hiphei leh Dr K Beichhua, MADC chief executive member Zachono leh sorkar official-te bakah, bank pathum - State Bank of India, Mizoram Cooperative Apex Bank leh Mizoram Rural Bank hotute an tel a ni.

Lawngtlai District Screening Committee on Housing for All pawh nimin khan an chairman DC Dr. A Muthamma hoin DC conference hall-ah an ṭhukhawm.

Meeting-ah hian Lunglei DUDO Andrew Lalhruaia chuan Beneficiary Led Construction (in sak tanpuina) leh Credit Linked Subsidy Scheme (in sak ṭanpuina loan) chung-chang a lem nen a sawifiah hnuah,Lawngtlai khawpui chhunga mi rethei in sak ṭanpuina kal zelah department-in a scheme atanga
ṭanpuina diltute an chenna in ngeia an enfiah vek hnua an hmuh dante an thlirho.

Beneficiary Led Construction dawng thei tur hian India khua leh tui dik tak, tuna an chenna khuaa January 1, 2014 hma lam kum nga tal lo cheng tawh, kum khata cheng nuai 3 la lut tling lo, in sakna tur ram leh a lehkha nei ngei, mahni puala chenna in la nei lo emaw chenna in awngrawp tawh tak mahnia sa tha thei si lo emaw nih a ngai.

Credit Linked Subsidy Scheme (CLSS) loan hi kum khata cheng nuai 6 aia tlem la lut chinin an dilin, an dawng thei ang. Cheng nuai 6 thleng lakin, a pung (interest) subsidy 6.5% chu sorkar laipui tum tur a ni a; cheng nuai 6 chung lam lak chuan, nuai 6 a chuanna chin zawng pung chu a latuin a rulh vek tur a ni thung. Loan hi in thar sak nan emaw, in zauh nan emaw, in sak belh nan emaw hman theih a ni.