Tlabung panna kawng siam turin ngen

Tlabunga tlawm-ngai pawl hrang hrang hruai-tute chu nimin khan MZP sub-headquarters, Tlabung pisaah an ṭhu-khawm a, Tlabung khaw-tlang mamawh hrang hrang an sawiho. Tlabung panna kawng chhia chu sorkarin siam thuai se an duh thu an tarlang.

Meeting hi Tlabung MZP president P Van-lallawma'n a kaihruai a; kalkhawmte chuan, tun hnaia National Highway no. 302-a puan Tlabung leh Lunglei inkar kawngpui chu thawm ṭhat a ngai hle tih sawiin, "Kawng chhe lai zawng zawng thawm ṭhat a nih theih loh pawhin, a chhe zualpui tal rang taka thawm ṭhat a nih theih nan thuneitute'n hma min lakpui se kan duh tak zet a ni," an ti.

Meeting chuan, Tla-bung aṭanga sorkar hna-thawk sawn chhuahte hmun ruak hnawhkhah a ni ngai lo tih sawiin, "Tun hnuah anmahni thlak tur an awm a nih loh chuan sorkar hnathawk tu pawh Tlabung aṭangin sawn chhuah ni tawh suh se," an ti a; tun hnaia Tlabung aṭanga medical officer pakhat sawn chhuah, tun thlenga a aiawhtu tur dah a la ni lo chu pawi an tih thu leh, Health department inkaihhruai danah Tlabung damdawi-inah staff nurse 10 awm tur an nih laia pali chiah an awm chu vanduaithlak an tih thu an sawi.

Tlabunga tlawmngai pawl hruaitute sawi dan-in, Tlabung damdawi-inah hun rei tak chhung x-ray technician an awm lo tawh lo a; health supervisor, dental surgeon, ophthalmist leh pharmacist pawh hun rei tak chhung an nei tawh lo a ni.

Tlabunga NGO-te meeting-ah hian YMA, MUP, MHIP leh MZP hruaitute an tel a ni.