Mizoramah Covid-19 vei thi awm belh

November 23, 2020 chhûna thi R Hrangthanga (40) s/o R Ngurchhawna, Thenzawl Vengchhak chu a thih aṭanga ni 30-na, December 23 khan Covid-19 vanga thi a nih thu sorkarin a puang a; Mizorama Covid-19 vei thi pariatna a ni.

 

R Hrangthanga hi police niin, Police Training School (PTS), Thenzawlah a awm a, kumina Bihar Assembly inthlanpuia Mizoram police eng emaw zat duty zingah a tel. November 12-ah Mizoramah an rawn haw thleng a, swab sample endik nghal niin, Covid-19 vei a ni tih hmuh chhuah a nih avangin Covid care centre-ah awmtir a ni.

 

Covid-19 positive a ni tih hmuh chhuah aṭanga ni 10-na, November 22-ah Rapid Antigen Test (RAT) hmangin a swab sample endik leh a ni a, RAT-ah negative a nih avangin PTS lama inkhung hrang zui tura chhuahtir nghal a ni.

 

CCC aṭanga a chhuah tûk, November 23, 2020 chawhma dar 11:05-ah R Hrangthanga chu a thi a, CCC aṭanga a chhuah hmaa RAT negative a nih avangin a thih hnuah TrueNAT-PCR hmangin a swab sample chu Serchhip District Hospital-ah endik leh a ni. Sample test result chu November 23 zanlai hma deuhin hriat a ni a, Covid-19 positive tih finfiah leh a ni ta a ni.

 

R Hrangthanga hi a thih hnuah Covid-19 positive a ni tih finfiah leh ni mah se, Covid-19 vei thi a nih leh nih lohah sorkarin hun eng emaw chen thu chiang a nei lo a; Serchhipa Chief Medical Officer chu chhui zuitir niin, a chhuina report aṭangin Mizoram sorkar chuan Covid-19 vanga thi a nih thu, November 22, 2020 khan a puang ta chauh a ni.