Adhaar Card siam hna chhunzawm

Aizawl DC pisaa Adhaar card siam-na atana biometric enrolment siam hna chhunzawm zel a ni a, veng hrang hrangah pawh thawktute kal kualin an buaipui mek bawk.

Thu dawn danin, biometric enrolment centre hi 20 vel hawn a ni a, chu’ng centre hrang hrangah chuan ni tin khaihlak loin inziak lut tura intlar an awm reng a, centre pakhatah a tlangpuiin ni khatah mi 40 vel an chhinchhiah hman a ni.

Biometric enrolment buaipuitute chuan, veng mala ti duhte tan Aizawl DC pisaah inhriattir theih a ni a, kar hmasa aṭang khan veng ṭhenkhatah chuan enrolment tih a ni tawh a, thawktu an indaih loh avangin veng tam takah a ruala tih theih a ni lo. Mahni venga enrolment ti duhte chu chhinchhiahin, a tahtawlin an vengah an kal chilh ṭhin.

Biometric enrolment buaipui tura Mizoram sorkarin a rawih, Electronic Corporation of India Ltd.-in a hna a chhunzawm theih loh avangin biometric enrolment hi hun eng emaw chen a khaihlak a; tunah hian Unique Identification Authority of India chu he hnathawk tur hian hman a ni a, September 1, 2016 aṭangin hna an thawk leh ṭan a ni.

Ruahmanna tharah chuan, registrar atan Mizoram sorkara General Administration Department hman a ni a, nodal department atan Information & Communication Technology department hman niin, district hrang hranga DC-te chu enrolment agency an ni.